Suriya: ఆ వార్తలను ఖండించిన సూర్య సినిమా నిర్మాత

ఇంటర్నెట్‌ డెస్క్‌: సూర్య (Suriya) హీరోగా దర్శకుడు వెట్రిమారన్‌ ‘వాడివాసల్‌’ (Vaadivaasal) అనే చిత్రాన్ని ఇటీవల ప్రకటించారు. ఇప్పటికీ చిత్రీకరణ ప్రారంభంకాకపోవడంతో ఆ సినిమా ఆగిపోయిందంటూ వదంతులు వ్యాపించాయి. దీనిపై కోలీవుడ్‌ మీడియా.. చిత్ర నిర్మాత కలైపులి ఎస్‌. థానును ప్రశ్నించగా ఆయన స్పందించారు. ఆ వార్తలను ఖండించిన ఆయన అలాంటి అసత్య ప్రచారాలు చేయొద్దని కోరారు. కొందరు పది నిమిషాల్లో ఫేమ్‌ పొందేందుకు అలా చేస్తుంటారని, సినీ అభిమానులు వాటిని నమ్మొద్దని విజ్ఞప్తి చేశారు. ఆ చిత్రం ఇంకా ప్రీ ప్రొడక్షన్‌ దశలోనే ఉందని వెల్లడించారు.

సి. ఎస్‌. చెలప్ప రాసిన ‘వాడివాసల్‌’ అనే నవల ఆధారంగా ఈ చిత్రం తెరకెక్కనుంది. తమిళనాడులో ప్రసిద్ధిగాంచిన జల్లికట్టు ఆటకు సంబంధించిన కథాంశంతో రూపొందనుంది. మరోవైపు, ప్రముఖ దర్శకుడు బాల దర్శకత్వం వహిస్తున్న ఓ సినిమా నుంచి సూర్య వైదొలిగిన సంగతి తెలిసిందే. ప్రస్తుతం శివ డైరెక్షన్‌లో నటిస్తున్నారు సూర్య. టైటిల్‌ ఖరారుకాని ఆ చిత్రంలో బాలీవుడ్‌ నటి దిశా పటానీ కథానాయికగా సందడి చేయనుంది.