Naga Vamsi: ‘గుంటూరు కారం’ పాటల విడుదలపై ప్రశ్న.. నిర్మాత సమాధానమేంటంటే?

ఇంటర్నెట్‌ డెస్క్‌: మహేశ్‌ బాబు (Mahesh Babu) హీరోగా దర్శకుడు త్రివిక్రమ్‌ తెరకెక్కిస్తున్న చిత్రం ‘గుంటూరు కారం’ (Guntur Kaaram). వచ్చే ఏడాది జనవరి 12న విడుదలకానున్న ఈ సినిమా పాటల కోసం మహేశ్‌ అభిమానులు ఆసక్తిగా ఎదురుచూస్తున్నారు. ఇప్పటికే విడుదలైన ఓ పాట విశేషంగా అలరించిన సంగతి తెలిసిందే. ‘ఆదికేశవ’ (Aadikeshava) ట్రైలర్‌ లాంచ్‌ ఈవెంట్‌లో.. మిలిగిన పాటల విడుదలపై ప్రశ్న ఎదురవగా నిర్మాత నాగవంశీ (Naga Vamsi) స్పందించారు. మరి, ఆయన ఏమన్నారంటే?

* ‘గుంటూరు కారం’ సినిమా విడుదలకు సమయం దగ్గరపడుతోంది. ఇంకా రిలీజ్‌కావాల్సిన పాటలున్నాయి. అవి విడుదలై శ్రోతలకు చేరువయ్యేందుకు టైమ్‌ సరిపోతుందంటారా?

నాగవంశీ: విడుదలకు ఇంకా మూడు పాటలున్నాయి. అవి అందరికీ చేరువయ్యేందుకు సమయం సరిపోతుంది. పాటలు అద్భుతంగా ఉంటాయి. వచ్చే ఏడాదంతా పాడుకునేలా ఉంటాయి. వచ్చేవారం రెండో పాటను రిలీజ్‌ చేస్తాం.

* ‘ఆదికేశవ’ మాస్‌ ఎంటర్‌టైనర్‌. ‘లియో’ సినిమాలో ఉన్నట్లు ఇందులో స్పెషల్‌ ఎలిమెంట్స్‌ ఏమైనా ఉన్నాయా?

నాగవంశీ: ‘లియో’లోని విజువల్స్‌, నేపథ్య సంగీతం ప్రేక్షకులను బాగా ఆకట్టుకున్నాయి. ‘ఆదికేశవ’ విషయానికొస్తే.. వాటితోపాటు మంచి కామెడీ, పాటలు, యాక్షన్‌ సీక్వెన్స్‌ అదనం. ఈ ఏడాది సంక్రాంతికి విడుదలైన ‘వీరసింహారెడ్డి’, ‘వాల్తేరు వీరయ్య’ తర్వాత మళ్లీ అలాంటి పూర్తిస్థాయి మాస్‌ చిత్రాలు రాలేదు. ఇటీవల ‘భగవంత్‌ కేసరి’ వచ్చినా అందులో మరో జానర్‌ను టచ్‌ చేశారు. ‘ఆదికేశవ’ పూర్తిస్థాయి మాస్‌ సినిమా. 

* ఈ చిత్రాన్ని వైష్ణవ్‌తేజ్‌తోనే చేయాలనుకున్నారా? మరో హీరోని సంప్రదించారా?

నాగవంశీ: నేను కథ విన్నప్పుడే వైష్ణవ్‌తేజ్ అయితే బాగుంటుందని అనుకున్నా. ఆయన్నే ఎంపిక చేశాం.

వైష్ణవ్‌తేజ్‌ (Vaishnav Tej), శ్రీలీల (Sree Leela) జంటగా నూతన దర్శకుడు శ్రీకాంత్‌ ఎన్‌.రెడ్డి తెరకెక్కించిన చిత్రమే ‘ఆదికేశవ’. నాగవంశీ నిర్మాతగా వ్యవహరించారు. ఈ నెల 24న సినిమాని ప్రేక్షకుల ముందుకు తీసుకొస్తున్న నేపథ్యంలో హైదరాబాద్‌లో ఈవెంట్‌ నిర్వహించి ట్రైలర్‌ విడుదల చేశారు.