Nagababu: ‘ఆరెంజ్‌’ రీ రిలీజ్‌.. వసూళ్ల విషయంలో నాగబాబు వినూత్న నిర్ణయం

హైదరాబాద్‌: రామ్‌చరణ్‌ (Ram Charan) నటించిన ఫీల్‌గుడ్‌ ప్రేమకథా చిత్రం ‘ఆరెంజ్‌’ (Orange). చెర్రీ బర్త్‌డేని పురస్కరించుకుని దీన్ని రీ రిలీజ్‌ చేయనున్న విషయం తెలిసిందే. ఈ నేపథ్యంలో రీ రిలీజ్‌ కలెక్షన్స్‌ విషయంలో చిత్ర నిర్మాత, జనసేన నేత నాగబాబు సరికొత్త నిర్ణయం తీసుకున్నారు. సినిమాకు వచ్చే డబ్బు మొత్తాన్ని జనసేన పార్టీకి విరాళంగా ఇవ్వనున్నట్లు ప్రకటించారు. వినోదమే కాకుండా..  పార్టీ బలోపేతాన్ని దృష్టిలో పెట్టుకుని చేపట్టిన ఈ కార్యక్రమంలో పాల్గొనాలంటూ  మెగా అభిమానులు, జన సైనికులకు పిలుపునిస్తూ గురువారం ఆయన ఓ ప్రెస్‌నోట్‌ను విడుదల చేశారు.

రామ్‌చరణ్‌ - జెనీలియా జంటగా ‘ఆరెంజ్’ తెరకెక్కింది. భాస్కర్‌ దీనికి దర్శకత్వం వహించగా.. నాగబాబు నిర్మాతగా వ్యవహరించారు. ఎన్నో అంచనాల మధ్య 2010లో విడుదలైన ఈ సినిమా ఆశించిన ఫలితాన్ని అందుకోలేకపోయింది. ఇక టాలీవుడ్‌లో ప్రస్తుతం నడుస్తోన్న రీ రిలీజ్‌ల ట్రెండ్‌ను దృష్టిలో ఉంచుకుని ‘ఆరెంజ్‌’ చిత్రాన్ని మరోసారి ప్రేక్షకుల ముందుకు తీసుకువచ్చేందుకు చిత్రబృందం సిద్ధమైంది. రామ్‌చరణ్‌ పుట్టినరోజుకు ముందు మార్చి 25, 26 తేదీల్లో తెలుగు రాష్ట్రాల్లోని పలు థియేటర్లలో ఈ చిత్రాన్ని విడుదల చేయనున్నారు.