Pushpa 2: బాలీవుడ్‌ ఆసక్తిగా ఎదురు చూస్తున్న చిత్రం ‘పఠాన్’, ‘టైగర్3’ కాదట!

ఇంటర్నెట్‌డెస్క్‌: ప్రస్తుతం హిందీ ప్రేక్షకులు ఆసక్తిగా ఎదురు చూస్తున్న చిత్రం ఏదో తెలుసా? ఇటీవల వచ్చిన ఆమిర్‌ఖాన్‌ ‘లాల్‌సింగ్‌ చడ్డా’తో మెప్పించలేకపోయారు కాబట్టి, షారుఖ్‌ ‘పఠాన్’, సల్మాన్‌ ‘టైగర్3’ అనుకుంటున్నారా? అయితే మీరు పొరపాటుపడినట్లే. మరి ఆ చిత్రం ఏంటంటే, అల్లు అర్జున్‌ ‘పుష్ప2’. తాజాగా ఓర్‌మ్యాక్స్‌ మీడియా నివేదిక ప్రకారం 2023లో బాలీవుడ్‌ ఎదురుచూస్తున్న ఆసక్తికర చిత్రం ఇదే.

గతేడాది వచ్చిన విడుదలైన ‘పుష్ప: ది రైజ్‌’ తెలుగుతో పాటు, బాలీవుడ్‌లోనూ ఘన విజయాన్ని అందుకున్న సంగతి తెలిసిందే. ముఖ్యంగా బన్ని స్టైల్‌, మేనరిజమ్స్‌కు అక్కడి ప్రేక్షకులు ఫిదా అయ్యారు. ఇప్పుడు ఈ సినిమాకు కొనసాగింపుగా, ‘పుష్ప: ది రూల్‌’ రాబోతోంది. దీని కోసం తెలుగు ప్రేక్షకులతో పాటు, బాలీవుడ్‌ కూడా ఆసక్తిగా ఎదురు చూస్తున్నట్లు ఓర్‌మ్యాక్‌ మీడియా నివేదిక చెబుతోంది. ‘పుష్ప2’ తర్వాత ‘పఠాన్’, ‘టైగర్‌3’ ఉన్నాయి. ఆ తర్వాత ‘జవాన్’, ‘డంకీ’ చిత్రాలు ఉండటం గమనార్హం. మరోవైపు ‘పుష్ప’ సినిమాకు సంబంధించిన వర్క్‌ను దర్శకుడు సుకుమార్‌ మొదలు పెట్టారు. ఇటీవల ఫొటోషూట్‌ నిర్వహించారు. అన్నీ కుదిరితే దీపావళి కానుకగా చిత్ర బృందం సర్‌ప్రైజ్‌ ఇచ్చే అవకాశం ఉంది.