Madhavan: పంచాంగం పేరు చెప్పటం నిజంగా నా అజ్ఞానమే.. కానీ: మాధవన్‌

ఇంటర్నెట్‌డెస్క్‌: ప్రముఖ ఇస్రో(ISRO) శాస్త్రవేత్త నంబి నారాయణ్‌(Nambi Narayanan) జీవితాన్ని ఆధారంగా చేసుకుని నటుడు మాధవన్‌ (Madhavan) తెరకెక్కించిన చిత్రం ‘రాకెట్రీ’ (Rocketry). మాధవన్‌ స్వీయ దర్శకత్వంలో తెరకెక్కిన ఈ సినిమా ప్రమోషన్స్‌లో భాగంగా ఆయన చేసిన వ్యాఖ్యలపై నెటిజన్లు తీవ్ర విమర్శలు గుప్పిస్తున్నారు. దీనిపై తాజాగా మాధవన్‌ స్పందించారు. ఈ విమర్శలకు తాను అర్హుడినేనన్న మాధవన్‌.. రాకెట్‌లను ప్రయోగించడానికి ఇస్రోకు పంచాంగం ఉపయోగపడిందని మాట్లాడటం తన అజ్ఞానమేనన్నారు. అయితే, తాను ఈ వ్యాఖ్యలు చేసినంత మాత్రాన రెండు ఇంజిన్లను ఉపయోగించి మార్స్‌ మిషన్‌ విజయవంతం చేయడం నిజం కాకుండా పోదన్నారు. అది ఎప్పటికీ రికార్డేనని చెప్పుకొచ్చారు.

ఇంతకీ ఏం జరిగిందంటే?

‘రాకెట్రీ’ ప్రమోషన్స్‌లో భాగంగా జరిగిన ఓ ప్రెస్‌మీట్‌లో అంతరిక్షంలోకి రాకెట్‌ను ప్రయోగించేందుకు, అది అంగారక కక్ష్యలోకి చేరేందుకు ఇస్రోకు పంచాంగం ఉపయోగపడిందని మాధవన్‌ అన్నారు. ఇస్రో వాళ్లు పంచాంగం చూసి పెట్టిన ముహూర్తబలం వల్లే భారత మార్స్‌ మిషన్‌ అవాంతరాలను అధిగమించిందని  ఆయన వ్యాఖ్యానించారు. గ్రహాల స్థితిగతులన్నీ పంచాంగాల్లో నిక్షిప్తమై ఉంటాయని మాధవన్ చేసిన వ్యాఖ్యలు సోషల్‌మీడియాలో వైరల్‌గా మారాయి. ఈ వీడియో చూసిన నెటిజన్లు ఆయన్ని విపరీతంగా ట్రోల్స్‌ చేస్తున్నారు. ‘‘సైన్స్‌ అందరికీ అర్థమయ్యే విషయం కాదు. సైన్స్‌ తెలియకపోవడం కూడా సమస్య కాదు. కానీ, అసలు విషయం తెలుసుకోకుండా ఇలాంటివి మాట్లాడే బదులు సైలెంట్‌గా ఉండటం మంచిది’’, ‘‘ఇదేం పిచ్చి మాటలు’’, ‘‘మీరు మాట్లాడే మాటలకు ఏదైనా అర్థం ఉందా?’’ అని నెటిజన్లు వరుస కామెంట్స్‌ చేయడంతో మాధవన్‌ వివరణ ఇచ్చే ప్రయత్నం చేశారు. తమిళం, హిందీ, ఇంగ్లిష్‌ భాషల్లో ‘రాకెట్రీ’ ప్రపంచవ్యాప్తంగా జులై 1న విడుదల కానుంది. షారుఖ్‌, సూర్య ఈ సినిమాలో కీలకపాత్రల్లో కనిపించనున్నారు.