Radheshyam: ‘రాధేశ్యామ్‌’ రిజల్ట్‌పై ప్రభాస్ ఏమన్నారంటే..!

చిత్ర దర్శకుడు రాధాకృష్ణ కుమార్‌ ఆసక్తికర వ్యాఖ్యలు

హైదరాబాద్‌: ఫీల్‌గుడ్‌, క్లాసిక్‌ ప్రేమకథా చిత్రంగా విడుదలై బాక్సాఫీస్‌ వద్ద పాజిటివ్‌ టాక్‌ సొంతం చేసుకున్న చిత్రం ‘రాధేశ్యామ్‌’. ప్రభాస్‌, పూజాహెగ్డే జంటగా నటించిన ఈ చిత్రానికి రాధాకృష్ణకుమార్‌ దర్శకత్వం వహించారు. ఈ సినిమా విడుదలైన నాటి నుంచి ప్రేక్షకుల నుంచి మిశ్రమ స్పందనలు వస్తున్నాయి. కాగా, ‘రాధేశ్యామ్‌’కు వస్తోన్న డివైడ్‌ టాక్‌పై రాధాకృష్ణ స్పందించారు. సినిమా ప్రమోషన్‌లో భాగంగా ఓ ఇంటర్వ్యూలో ఆయన స్పందించారు.

‘‘మా సినిమాపై ప్రశంసలు, విమర్శలు రెండూ ఒకేలా వస్తున్నాయి. సినిమా విడుదలైన సమయంలో కొంతమంది నుంచి నెగెటివిటీ ఎందుకు వచ్చిందో అర్థం కాలేదు. కానీ, ఇప్పుడు ప్రతి ఒక్కరూ ఈ చిత్రానికి కనెక్ట్‌ అవుతున్నారు. సినిమా చాలా బాగుందని, ఎమోషనల్‌గా కనెక్ట్‌ అవుతున్నామని.. చాలా మంది నాకు మెస్సేజ్‌లు పెడుతున్నారు. ముఖ్యంగా నా సతీమణి నుంచి వచ్చిన ప్రశంస మర్చిపోలేను. సినిమా చాలా బాగుందని, చాలా సన్నివేశాలకు కన్నీళ్లు పెట్టుకున్నానని తను చెప్పింది. సినిమా విడుదలయ్యాక ప్రభాస్‌ని కలవలేదు. ఎందుకంటే ఆయన ప్రస్తుతం హాలీడే కోసం విదేశాలకు వెళ్లారు. మేమిద్దరం ఫోన్స్‌లోనూ మాట్లాడుకోలేదు.. కానీ సమయం దొరికినప్పుడు మెస్సేజ్‌లు చేసుకుంటున్నాం. ‘‘మొదటి మూడు రోజులు నా ఇమేజ్‌ సినిమాని డామినేట్‌ చేసేస్తుంది’’ అని ప్రభాస్‌ నాకు చాలా సార్లు చెప్పాడు’’ అని రాధాకృష్ణ కుమార్‌ తెలిపారు.