Rajini-Mohanbabu: ప్రాణమిత్రులు కలిశారిలా!

హైదరాబాద్‌: అగ్ర నటులు రజనీకాంత్‌, మోహన్‌బాబు ఎంత‌టి ప్రాణ స్నేహితులో చాలామందికి తెలిసిందే. రజనీ కథానాయకుడిగా శివ దర్శకత్వంలో తెరకెక్కుతున్న చిత్రం ‘అణ్ణాత్తే’. ఇటీవల ఈ సినిమా చిత్రీకరణ హైదరాబాద్‌ రామోజీ ఫిల్మ్‌సిటీలో పూర్తి చేసుకుంది. రజనీకాంత్‌పై కీలక సన్నివేశాలను తెరకెక్కించారు. ఈ సినిమా చిత్రీకరణ పూర్తి చేసుకున్న రజనీ హైద‌రాబాద్‌లోని తన ప్రియ మిత్రుడు మోహన్ బాబు ఇంటికి వెళ్లారు.

అక్క‌డే రెండు రోజుల‌ పాటు సంతోషంగా గ‌డిపారు. ఆ తర్వాత  ప్ర‌త్యేక విమానంలో చెన్నై వెళ్లారు. ఆ స‌మ‌యంలో ర‌జనీకాంత్‌, మోహ‌న్‌బాబు, విష్ణు మంచు క‌లిసి ఫొటోలు దిగారు. ‘ఒరిజిన‌ల్‌ గ్యాంగ్‌స్ట‌ర్స్ క‌లిసిన వేళ’ అంటూ మంచు విష్ణు ఆ ఫొటోలను తన ట్విటర్‌లో పంచుకున్నారు. వైట్‌ అండ్‌ వైట్‌లో అగ్ర నటులిద్దరూ మెరిసిపోతూ కనిపించారు. ప్ర‌స్తుతం ఈ ఫొటోలు సోష‌ల్‌మీడియాలో వైర‌ల్ అవుతున్నాయి.