నాకు వేరే ఎవరితోనూ పోటీ లేదు: రకుల్‌

ఇంకా ‘చెక్‌’ చూడలేదు: నటి

హైదరాబాద్‌: వరుస బాలీవుడ్‌ షూటింగ్స్‌ వల్ల తాను ఇంకా ‘చెక్‌’ చిత్రాన్ని వీక్షించలేదని నటి రకుల్‌ప్రీత్‌ సింగ్‌ తెలిపారు. నితిన్‌ కథానాయకుడిగా ప్రముఖ దర్శకుడు చంద్రశేఖర్‌ యేలేటి రూపొందించిన చిత్రం ‘చెక్‌’. ఇందులో రకుల్‌ప్రీత్‌ సింగ్‌ లాయర్‌ మానసగా కీలకపాత్ర పోషించారు. ఇటీవల విడుదలైన ఈ సినిమా బాక్సాఫీస్‌ వద్ద మిశ్రమ స్పందనలు అందుకుంది. ఈ నేపథ్యంలో రకుల్‌ తాజాగా ఓ ఇంటర్వ్యూలో పాల్గొని ‘చెక్‌’ గురించి కొన్ని ఆసక్తికర విశేషాలు బయటపెట్టారు.

‘‘చంద్రశేఖర్‌ యేలేటి తెరకెక్కించిన ఓ రెండు చిత్రాలను గతంలో వీక్షించాను. ఆయన సినిమాలు నాకు ఎంతో నచ్చాయి. ‘చెక్‌’ కోసం నన్ను సంప్రదించినప్పుడు.. మానస పాత్ర నాకు నచ్చడంతో వెంటనే ఓకే చెప్పేశాను. ఓ ఖైదీ కోసం పోరాటం చేసే క్రమంలో మానస కూడా వ్యక్తిగతంగా ఎంతో మారుతుందని చూపించిన విధానం నాకు నచ్చింది’’

‘‘ప్రస్తుతానికి నేను ముంబయిలో ఉన్నాను. బాలీవుడ్‌ సినిమా షూట్స్‌లో బిజీగా ఉండడంతో ఇంకా ‘చెక్‌’ చిత్రాన్ని వీక్షించలేదు. కానీ, తెలిసిన వాళ్లు ఫోన్‌ చేసి సినిమా బాగుందని చెప్పారు. ‘చెక్‌’ కథ చాలా విభిన్నమైనది. నటి అంటే తప్పకుండా అన్నిరకాల పాత్రలు పోషించాలి. కమర్షియల్‌ లేదా నాన్‌ కమర్షియల్‌.. కథ ఎలాంటిదైనా సరే నటనలో వైవిధ్యం చూపించాలి. నేను ఎప్పుడూ బయటవాళ్లతో పోటీ గురించి ఆలోచించను. ఎందుకంటే, నాతో నేనే పోటీ పడతాను. ప్రతిరోజూ సెట్‌లోకి అడుగుపెట్టగానే ఈరోజు కొత్తగా ఏం నేర్చుకున్నాను.? కొత్త విషయాలు ఏం తెలుసుకున్నాను? అనే అనుకుంటాను’’

‘‘క్రిష్‌ డైరెక్షన్‌లో నేను కథానాయికగా ఓ సినిమా తెరకెక్కుతోన్న విషయం తెలిసిందే. వైష్ణవ్‌ తేజ్‌ కథానాయకుడు. ఈ సినిమాలో మా ఇద్దరి పాత్రలు విభిన్నంగా ఉంటాయి. అందులో నేను మేకప్‌ లేకుండా.. డీ గ్లామర్‌ లుక్‌లో కనిపిస్తాను’’ అని రకుల్‌ వివరించారు.