Sharwanand: ఘనంగా హీరో శర్వానంద్‌ నిశ్చితార్థం

హైదరాబాద్‌: హీరో శర్వానంద్‌ (Sharwanand) త్వరలో తన సింగిల్‌ లైఫ్‌కు ఫుల్‌స్టాప్‌ పెట్టనున్నారు‌. రక్షితా రెడ్డితో ఆయన ఏడడుగుల బంధంలోకి అడుగుపెట్టనున్నారు. తాజాగా ఈ జంటకు నిశ్చితార్థం జరిగింది. ఇరు కుటుంబసభ్యుల సమక్షంలో గురువారం ఉదయం హైదరాబాద్‌లోని ఓ హోటల్‌లో జరిగిన ఈ వేడుకలో చిరంజీవి దంపతులు, అక్కినేని నాగార్జున దంపతులు, రామ్‌చరణ్‌ దంపతులు, నాని, రానా, అల్లరి నరేశ్‌,  సిద్ధార్థ్‌, నితిన్‌, శ్రీకాంత్‌, తరుణ్‌, నవీన్‌, అదితిరావు హైదరి తదితరులు పాల్గొన్నారు. కాబోయే వధూవరులకు శుభాకాంక్షలు తెలిపారు. దీనికి సంబంధించిన ఓ ఫొటో నెట్టింట వైరల్‌గా మారింది. దీనిని చూసిన నెటిజన్లు.. కొత్త జంటకు విషెస్‌ చెబుతున్నారు.

శర్వానంద్‌కు కాబోయే భార్య రక్షిత సాఫ్ట్‌వేర్‌ ఉద్యోగి. ఆమె తండ్రి మధుసూదన్‌రెడ్డి. ఆయన హైకోర్టు లాయర్‌. తల్లి సుధారెడ్డి. పెళ్లి తేదీని త్వరలోనే ప్రకటించనున్నారు.
ఇకపోతే ఈ హీరో సినిమాల విషయానికి వస్తే.. ‘ఒకే ఒక జీవితం’ విజయం తర్వాత శర్వానంద్‌ నుంచి కొత్త ప్రాజెక్ట్‌లకు సంబంధించిన అప్‌డేట్‌లు ఏమీ బయటకు రాలేదు. పెళ్లి పనుల్లో బిజీగా ఉండటంతోనే ఆయన కొంత విరామం తీసుకున్నారని.. త్వరలోనే కొత్త సినిమాల గురించి ప్రకటిస్తారని సమాచారం.