Ram Gopal Varma: రామ్‌గోపాల్‌ వర్మ రాజకీయ ‘వ్యూహం’.. శపథం!

ఇంటర్నెట్‌ డెస్క్‌: తన తదుపరి చిత్రం రాజకీయ నేపథ్యంలో తెరకెక్కుతుందని ప్రముఖ దర్శకుడు రామ్‌గోపాల్‌ వర్మ (Ram Gopal Varma) ట్విటర్‌ వేదికగా ప్రకటించారు. ‘వ్యూహం’ పేరుతో తొలి భాగాన్ని, ‘శపథం’ పేరుతో రెండో భాగాన్ని రూపొందిస్తున్నట్టు తెలిపారు. ‘‘అహంకారానికి, ఆశయానికి మధ్య జరిగిన పోరాటం నుంచి ఉద్భవించిన ‘వ్యూహం’ కథ.. రాజకీయ కుట్రల విషంతో నిండి ఉంటుంది. రెండు పార్ట్‌ల్లోనూ రాజకీయ అరాచకాలు ఉంటాయి. ప్రేక్షకులు తొలి చిత్రం షాక్‌ నుంచి తేరుకునేలోపే వారికి ఇంకో ఎలక్ట్రిక్‌ షాక్‌ పార్ట్‌ 2 రూపంలో తగులుతుంది. నేను గతంలో తీసిన ‘వంగవీటి’ సినిమా నిర్మాతే ఈ కొత్త చిత్రాన్నీ నిర్మిస్తున్నారు’’ అని ఆర్జీవీ వరుస ట్వీట్లు చేశారు.

‘‘ఇది బయోపిక్‌ కాదు. బయోపిక్‌ కన్నా లోతైన రియల్‌పిక్‌. బయోపిక్‌లో అయినా అబద్ధాలు ఉండొచ్చు కానీ రియల్‌ పిక్‌లో అన్నీ నిజాలే ఉంటాయి’’ అని ఆయన పేర్కొన్నారు. బుధవారం ఏపీ సీఎంతో సమావేశమై తిరుగు ప్రయాణంలో గన్నవరం విమానాశ్రయం చేరుకున్న ఆర్జీవీని ‘భేటీ దేని గురించి’ అని మీడియా ప్రతినిధులు ప్రశ్నించగా ఆయన స్పందించలేదు. తాను తీయబోయే సినిమా గురించి చర్చించేందుకే ఆర్జీవీ.. సీఎంను కలిశారంటూ వార్తలొచ్చాయి. అయితే, తాజాగా ఆయన చేసిన ఈ ట్వీట్‌తో ఇప్పుడు దానిపై క్లారిటీ ఇచ్చినట్టయింది.