Ramarao On Duty: అభిమానులకు రవితేజ టీజర్‌ సర్‌ప్రైజ్‌

ఇంటర్నెట్‌ డెస్క్‌: మహా శివరాత్రి సందర్భంగా తన అభిమానులు, సినీ ప్రియులకు ఓ కానుక అందించారు నటుడు రవితేజ(Ravi teja). ఆయన హీరోగా నటిస్తున్న ‘రామారావు ఆన్‌ డ్యూటీ’(Ramarao On Duty) చిత్ర టీజర్‌ను విడుదల చేశారు. యాక్షన్‌ సన్నివేశంతో ప్రారంభమైన టీజర్‌ ఆద్యంతం ఆసక్తిగా సాగింది. ‘‘ఆయుధం మీద ఆధారపడే నీలాంటివాడి ధైర్యం వాడే ఆయుధంలో ఉంటుంది. ఆయుధంలా బతికే నాలాంటివాడి ధైర్యం అణువణునా ఉంటుంది’’ అని రవితేజ చెప్పిన సంభాషణ టీజర్‌కు ప్రత్యేక ఆకర్షణగా నిలిచింది. ఈ సినిమాలో రవితేజ ప్రభుత్వాధికారిగా కనిపించనున్నారు. ఆయన సరసన దివ్యాంశ కౌశిక్‌, రజిషా విజయన్‌ సందడి చేయనున్నారు. శరత్‌ మండవ దర్శకత్వం వహిస్తున్న ఈ సినిమాను సుధాకర్‌ చెరుకూరి నిర్మిస్తున్నారు. వేణు తొట్టెంపూడి ముఖ్య భూమిక పోషిస్తున్నారు. త్వరలోనే ఈ సినిమా ప్రేక్షకుల ముందుకురానుంది. ఈ చిత్రానికి సంగీతం: శామ్‌ సీఎస్‌, ఛాయాగ్రహణం: సత్యన్‌ సూర్యన్‌, కూర్పు: ప్రవీణ్‌ కేఎల్‌, కళ: సాహి సురేష్‌.