RGV: ఆర్జీవీకి పేర్ని నాని ఆహ్వానం.. భేటీ ఆరోజే

ఇంటర్నెట్‌ డెస్క్‌: సినిమా టికెట్‌ ధరల విషయం చర్చించేందుకు తనను ఏపీ సినిమాటోగ్రఫీ శాఖ మంత్రి పేర్ని నాని ఆహ్వానించారని రామ్‌గోపాల్‌ వర్మ తెలిపారు. తన ట్విటర్‌ ఖాతా ద్వారా ఈ విషయాన్ని వెల్లడించారు. ‘‘ఆంధ్రప్రదేశ్‌లోని సినిమా టికెట్‌ ధరల విషయం గురించి మాట్లాడేందుకు పేర్ని నానిగారు నన్ను ఆహ్వానించారని తెలియజేసేందుకు ఆనందంగా ఉంది. అమరావతి సచివాలయంలో జనవరి 10న మధ్యాహ్నం భేటీ అవుతున్నాం’’ అని పేర్కొన్నారు. తనకు ఈ అవకాశం ఇచ్చినందుకు పేర్ని నానికి ధన్యవాదాలు తెలిపారు.

సినిమా టికెట్‌ ధరల విషయంలో ఏపీ ప్రభుత్వం తీసుకున్న నిర్ణయంపై రామ్‌గోపాల్‌ వర్మ ఇటీవల తన అభిప్రాయాన్ని వ్యక్తం చేసిన సంగతి తెలిసిందే. తన యూట్యూబ్‌ ఛానల్‌, సోషల్‌ మీడియా వేదికగా ఆ ప్రభుత్వానికి పలు ప్రశ్నలు సంధించారు. ఈ నేపథ్యంలో మంత్రి నాని ట్విటర్‌లో స్పందించారు. అలా ఒకరిపై ఒకరు మాటల యుద్ధానికి దిగారు. చివరగా.. ప్రభుత్వంతో గొడవపడాలనేది తన ఉద్దేశం కాదని, అనుమతిస్తే కలుస్తానని ఆర్జీవీ.. నానిని కోరారు. ‘త్వరలోనే కలుద్దాం’ అని నాని ఇటీవల రిప్లై ఇచ్చారు. ఈ క్రమంలో తనకు పేర్ని నాని నుంచి పిలుపు వచ్చిందని ఆర్జీవీ ట్వీట్‌ పెట్టారు.