Rangabali Teaser: ‘రంగబలి’ హంగామా

కుర్రాడు నాజూకు అనుకుంది ఆ అమ్మాయి. కానీ అతని అసలు స్వరూపం వేరు. మన ఊళ్లో మనల్నెవడ్రా ఆపేది అంటూ ఆ కుర్రాడు చేసిన హంగామా ఎలాంటిది? అలాంటి అబ్బాయితో ప్రేమలో పడిన అమ్మాయి కథేమిటో తెలియాలంటే ‘రంగబలి’ చూడాల్సిందే. నాగశౌర్య కథానాయకుడిగా ఎస్‌.ఎల్‌.వి.సినిమాస్‌ పతాకంపై తెరకెక్కుతున్న చిత్రమిది. యుక్తి తరేజా కథానాయిక. పవన్‌ బాసంశెట్టి దర్శకత్వం వహిస్తున్నారు. సుధాకర్‌ చెరుకూరి నిర్మాత. చిత్రీకరణ చివరి దశకు చేరుకుంది. గురువారం సినిమా టీజర్‌ని విడుదల చేశారు. నాగశౌర్య క్లాస్‌గా కనిపించే మాస్‌ కుర్రాడిగా చేసిన సందడి టీజర్‌కి ఆకర్షణగా నిలిచింది. ‘‘వాణిజ్య హంగులతో రూపొందుతున్న చిత్రమిది. యాక్షన్‌, రొమాంటిక్‌ అంశాలు, హాస్యం చిత్రానికి ప్రధాన బలం. జులై 7న సినిమాని ప్రేక్షకుల ముందుకు తీసుకొస్తాం’’ అని తెలిపాయి సినీ వర్గాలు. సత్య, సప్తగిరి, షైన్‌ టామ్‌ చాకో తదితరులు నటించిన ఈ చిత్రానికి సంగీతం: పవన్‌ సీహెచ్‌, ఛాయాగ్రహణం: దివాకర్‌ మణి, కూర్పు: కార్తీక శ్రీనివాస్‌, కళ: ఏఎస్‌ ప్రకాశ్‌.