Mission Majnu: నేరుగా ఓటీటీలో విడుదలవుతున్న రష్మిక చిత్రం

హైదరాబాద్‌: దక్షిణాదిలో దూసుకుపోతున్న రష్మిక (Rashmika Mandanna) బాలీవుడ్‌ ఎంట్రీ ఇచ్చిన చిత్రం ‘మిషన్‌ మజ్ను’ (Mission Majnu). సిద్ధార్థ్‌ మల్హోత్ర కథానాయకుడిగా నటించిన ఈ సినిమా ఇప్పటికే విడుదల కావాల్సి ఉండగా, వాయిదా పడుతూ వస్తోంది. తాజాగా కొత్త విడుదల తేదీని చిత్ర బృందం బుధవారం ప్రకటించింది. షంతను బగ్చీ దర్శకత్వం వహించిన ఈ చిత్రాన్ని జనవరి 20న నేరుగా ఓటీటీ వేదికగా ప్రేక్షకుల ముందుకు తీసుకురానున్నారు. ఈ సినిమా ‘నెట్‌ఫ్లిక్స్‌’లో స్ట్రీమింగ్‌కానుంది. 1970ల నాటి కథతో తెరకెక్కిన ఈ చిత్రంలో రా ఏజెంట్‌గా కనిపించనున్నాడు సిద్ధార్థ్‌. రోనీ స్క్రూవాలా, అమర్‌ బుటాలా, గరిమ మెహతా నిర్మిస్తున్నారు. తొలుత ఈ చిత్రాన్ని మే 13న విడుదల చేయడానికి సన్నాహాలు చేశారు.