Raveena Tandon: సూపర్‌హిట్‌ రెయిన్‌ సాంగ్‌.. అక్షయ్‌ ముద్దు పెట్టకూడదని షరతు పెట్టా: రవీనా టాండన్‌

ముంబయి: సూపర్‌హిట్‌ అందుకున్న బాలీవుడ్‌ రెయిన్‌ పాటల్లో ఒకటి ‘టిప్‌ టిప్‌ బర్‌సా పానీ’ (Tip Tip Barsa Paani). ‘మోహ్ర’ (Mohra) సినిమాలోని ఈ పాటకు అక్షయ్‌కుమార్‌ (Akshay Kumar), రవీనా టాండన్‌ (Raveena Tandon) చేసిన డ్యాన్స్‌ను సినీ ప్రియులు ఎప్పటికీ మర్చిపోలేరు. పసుపు రంగు చీరలో రవీనా వానలో తడుస్తూ అందాలను ఒలకబోస్తుంటే, ఆ వయ్యారాలు చూసి యువత మనసు పారేసుకున్నారు. అయితే, ఈ పాటకు సంబంధించిన ఓ ఆసక్తికర విషయాన్ని ఇటీవల రవీనా ఓ ఇంటర్వ్యూలో వెల్లడించారు. ఈ పాట షూట్‌ అప్పుడు తాను ఎన్నో షరతులు పెట్టానని ఆమె చెప్పారు.

‘‘పాటలో నా చీర జారినట్టు చూపించకూడదు. హీరోతో నాకు ముద్దు సన్నివేశాలు ఉండకూడదు. అలా చేయకూడదు, ఇలా చేయకూడదు అంటూ చాలా షరతులు పెట్టాను. ఇలా ఎన్నో కండిషన్స్‌ తర్వాత చివరకు ఆ పాట మీరు చూస్తున్న విధంగా రూపుదిద్దుకుంది. నటీనటుల మధ్య ఉన్న కెమిస్ట్రీని ఇబ్బందికరంగా ఎక్కడా చూపించలేదు. సాన్నిహిత్యాన్ని చూపించడంలోనూ హద్దులు దాటకుండా ప్రేక్షకులను ఆకర్షించే విధంగా రూపొందించారు’’ అని ఆమె వెల్లడించారు.

‘మోహ్ర’ సినిమా తర్వాత అక్షయ్‌ - రవీనా కొంతకాలంపాటు రిలేషన్‌లో ఉన్నారు. నిశ్చితార్థం కూడా జరిగింది. అయితే, కొన్ని కారణాలతో వీరిద్దరూ విడిపోయారు. ఇదే విషయంపై మాట్లాడుతూ.. ‘‘వ్యక్తిగత కారణాలతో మేము పెళ్లి వరకూ వెళ్లలేదు. విడిపోయి ఎవరి జీవితాలు వాళ్లు చూసుకున్నాం. అయినప్పటికీ అక్షయ్‌ నాకు మంచి స్నేహితుడు. నేను అతడిని గౌరవిస్తున్నాను. అలాగే, మన ఇండస్ట్రీలో ఉన్న గొప్ప నటుల్లో అతడు కూడా ఒకరు’’ అని ఆమె వెల్లడించారు.