Dhamaka: మరోసారి ట్రెండ్‌ అవుతున్న ‘పల్సర్‌ బైక్‌’ పాట..

హైదరాబాద్‌: గతేడాది చివర్లో ‘ధమాకా’తో సూపర్‌ హిట్‌ను తన ఖాతాలో వేసుకున్నారు మాస్‌ హీరో రవితేజ. ఆ సినిమాతో మాస్‌ ప్రేక్షకులను అలరించి భారీ కలెక్షన్లను సొంతం చేసుకున్నారు. ఇక ఈ చిత్రానికి భీమ్స్ సిసిరోలియో ఇచ్చిన సంగీతం హైలైట్‌గా నిలిచింది. సినిమా విడుదలైనప్పుడే కాదు నేటికీ ఈ సినిమాలోని పాటలు సోషల్‌ మీడియాలో ట్రెండ్‌ అవుతున్నాయి. తాజాగా మరోసారి ఇందులోని పల్సర్‌ బైక్‌ పాట నెట్టింట టాప్‌లో నిలిచింది.

త్రినాథరావు నక్కిన దర్శకత్వంలో వచ్చిన ఈ సినిమాలో పల్సర్‌ బైక్‌ పాటను రీమేక్‌ చేసిన సంగతి తెలిసిందే. రవితేజ, శ్రీలీల (Sreeleela) ఈ పాటకు వేసిన డ్యాన్స్‌కు ప్రేక్షకులు ఫిదా అయ్యారు. తాజాగా ఈ పాటకు 100మిలియన్ల వ్యూస్‌ వచ్చాయి. ఈ విషయంపై ఆనందాన్ని తెలుపుతూ మూవీ టీం ట్వీట్‌ చేసింది. దీంతో మరోసారి సోషల్‌ మీడియా ట్రెండింగ్‌లో ఆ పాట టాప్‌లో నిలిచింది. ప్రస్తుతం రవితేజ ‘టైగర్‌ నాగేశ్వరరావు’లో (Tiger Nageswara Rao) నటిస్తున్నారు. వంశీ దర్శకత్వంలో ఈ సినిమా తెరకెక్కుతోంది. స్టూవర్ట్‌పురం దొంగగా పోలీస్‌ రికార్డులకెక్కిన ‘టైగర్‌ నాగేశ్వరరావు’ జీవిత కథ ఆధారంగా దీన్ని రూపొందిస్తున్నారు. ఈ సినిమాలో నటి రేణూ దేశాయ్‌ (Renu Desai) హేమలతా లవణం అనే స్ఫూర్తిదాయకమైన పాత్రలో నటిస్తున్నారు. రవితేజ నటిస్తున్న తొలి పాన్‌ ఇండియా సినిమాగా రానున్న ఈ చిత్రం అక్టోబర్‌ 20న ప్రేక్షకుల ముందుకు రానుంది.