Ravanasura: చిరంజీవి అతిథిగా.. రవితేజ ‘రావణాసుర’ షురూ!

ఇంటర్నెట్‌డెస్క్‌: రవితేజ హీరోగా సుధీర్‌వర్మ తెరకెక్కిస్తున్న చిత్రం ‘రావణాసుర’. హీరోస్‌ డోన్ట్‌ ఎగ్జిస్ట్‌ అనేది ఉపశీర్షిక. ఈ సినిమా.. ప్రముఖ నటుడు చిరంజీవి, మంత్రి తలసాని శ్రీనివాస్‌ యాదవ్‌ ముఖ్య అతిథులుగా శుక్రవారం పూజా కార్యక్రమాలతో లాంఛనంగా ప్రారంభమైంది. చిరంజీవి క్లాప్‌కొట్టగా తలసాని కెమెరా స్విచ్ఛాన్‌ చేశారు. దర్శకుడు రాఘవేంద్రరావు ఈ సినిమా స్కిప్టును చిత్ర బృందానికి అందజేశారు. దర్శకులు గోపీచంద్‌ మలినేని, కె.ఎస్‌.రవీంద్ర (బాబీ) ముహూర్తపు సన్నివేశానికి గౌరవ దర్శకత్వం వహించారు. కథానాయికలు ఫరియా అబ్దుల్లా, దక్ష నగర్కార్‌, మేఘా ఆకాశ్‌, అను ఇమ్మాన్యుయేల్‌ తదితరులు ఈ కార్యక్రమంలో సందడి చేశారు.

రవితేజ నటిస్తున్న 70వ చిత్రమిది. యాక్షన్‌ థ్రిల్లర్‌ నేపథ్యంలో సాగుతుంది. ఇందులో రవితేజ న్యాయవాదిగా కనిపించనున్నారు. సుశాంత్‌ కీలక పాత్ర పోషిస్తున్నారు. ఈ చిత్రాన్ని అభిషేక్‌ పిక్చర్స్‌ పతాకంపై అభిషేక్‌ నామా నిర్మిస్తున్నారు. త్వరలోనే చిత్రీకరణ ప్రారంభంకానుంది. 2022 సెప్టెంబరు 30న విడుదల చేసేందుకు దర్శకనిర్మాతలు సన్నాహాలు చేస్తున్నారు.