‘రిపబ్లిక్‌’ టీజర్‌ వచ్చేసింది

హైదరాబాద్‌: ‘ప్రజాస్వామ్యం అంటే కేవలం ఓటు హక్కో, అరిచే హక్కో అనే భ్రమలో ఉన్నాం. కానీ కట్టకుండానే కూలిపోతున్న వ్యవస్థలే ఆ ప్రజాస్వామ్యానికి పునాదులని తెలియకుండా ఇంకా ఆ ఫ్యూడల్‌ వ్యవస్థలోనే బతుకుతున్నాం’ అని అంటున్నారు సాయిధరమ్‌ తేజ్‌. ఆయన కథానాయకుడిగా తెరకెక్కుతోన్న పవర్‌ఫుల్‌ కథాచిత్రం ‘రిపబ్లిక్‌’. దేవ్‌కట్ట దర్శకత్వం వహిస్తున్న ఈ సినిమాలో రమ్యకృష్ణ కీలకపాత్ర పోషిస్తున్నారు. పొలిటికల్‌ థ్రిల్లర్‌గా రూపుదిద్దుకుంటోన్న ‘రిపబ్లిక్‌’ టీజర్‌ను ప్రముఖ దర్శకుడు సుకుమార్‌ సోమవారం ఉదయం విడుదల చేశారు. సాయిధరమ్‌ తేజ్‌ నటన, డైలాగ్‌లు ఆకట్టుకునేలా ఉన్నాయి.

జేబీ ఎంటర్‌టైన్‌మెంట్స్‌, జీస్టూడియోస్‌ సంయుక్తంగా ఈ చిత్రాన్ని నిర్మిస్తున్నాయి. జె.భగవాన్‌ నిర్మాత. మణిశర్మ స్వరాలు అందిస్తున్నారు. ఐశ్వర్యా రాజేశ్‌ కథానాయిక. జగపతిబాబు ముఖ్య పాత్రలో కనిపించనున్నారు. జూన్‌ 4న ఈసినిమా ప్రేక్షకుల ముందుకు రానుంది. ప్రస్తుతం ఈ సినిమా చిత్రీకరణ శరవేగంగా జరుగుతోంది.