RGV: చిన్న సినిమాలు ఆడాలి... ఏపీ ప్రభుత్వం ధరలు పెంచాలి: వర్మ

ఇంటర్నెట్‌ డెస్క్‌: వాస్తవాలను అర్థవంతంగా చెప్పే వ్యక్తుల్లో ప్రముఖ దర్శకుడు రామ్‌ గోపాల్‌ వర్మ ఒకరు. సినీ పరిశ్రమకు చెందిన విషయాలపైనే కాకుండా సమకాలిన అంశాలపై తనదైన శైలిలో అభిప్రాయాలను సామాజిక మాధ్యమాల్లో పంచుకుంటారు.  ఇటీవల ఏపీ సినిమా థియేటర్ల టిక్కెట్‌ ధరలపై పోరాటం చేసిన ఆయన.. భోగి, సంక్రాంతి పండుగలను పురస్కరించుకొని శుభాకాంక్షలు తెలియజేశారు. ఎప్పుడూ పండగలకు విషెస్‌ చెప్పడానికి ఇష్టపడని ఆర్జీవీ.. ఈసారి సంక్రాంతి శుభాకాంక్షలు చెప్పారు.

‘‘మీకు అంబానీని మించిన ఇల్లు, డబ్బు రావాలి. అమ్మాయిలకు అందమైన అబ్బాయిలు, అబ్బాయిలకు అందమైన అమ్మాయిలు దొరకాలి. భర్తలను భార్యలు వేధించకూడదు. చిన్న సినిమాలు బాహుబలి కంటే పెద్ద హిట్‌ కావాలి. ఏపీ ప్రభుత్వం టికెట్ల ధరలు పెంచాలి. నన్ను ద్వేషించే వారి కోసం నేను త్వరగా చనిపోవాలి. మీ అందరికీ సంక్రాంతి శుభాకాంక్షలు’’ అని ఆర్జీవీ తనదైన శైలిలో ట్వీట్‌ చేశారు. ఇక ఏపీ థియేటర్ల టికెట్ల అంశంపై మాట్లాడిన ఆయన.. తాజాగా ఓ ఛానల్‌కి ఇచ్చిన ఇంటర్వ్యూలో ఇది ఫిల్మ్‌ ఇండస్ట్రీ సమస్య కాదని.. తన ఇగో ఇష్యూ అంటూ వ్యాఖ్యానించారు.