Kantara: దయచేసి.. ఆ శబ్దాన్ని అనుకరించవద్దు: రిషబ్‌ శెట్టి

‘కాంతార’లోని సన్నివేశాలు

ఇంటర్నెట్‌డెస్క్‌: దేశవ్యాప్తంగా సంచలన విజయాన్ని నమోదు చేసిన చిత్రం ‘కాంతార’ (Kantara). రిషబ్‌ శెట్టి (Rishab Shetty) స్వీయ దర్శకత్వంలో తెరకెక్కిన ఈ సినిమా.. ఎలాంటి అంచనాలు లేకుండా విడుదలై.. భారీ విజయాన్ని సొంతం చేసుకుంది. కర్ణాటక  తుళునాడులోని ఆచారాలను ఆధారంగా చేసుకొని దీన్ని రూపొందించారు. భూతకోల సంస్కృతిని తెలియజేశారు. ఇక, దేవుడు ఆవహించిన సమయంలో కోల ఆడే వ్యక్తులు ‘ఓ..’ అంటూ వింత శబ్దాన్ని చేస్తారని ఈ సినిమాలో చూపించారు. ఆ ధ్వని వినిపించిన ప్రతిసారీ థియేటర్లు దద్దరిల్లిపోయేలా ప్రేక్షకులు రియాక్ట్‌ అవుతున్నారు. ఈ సినిమా చూసి బయటకు వచ్చిన తర్వాత కూడా.. ‘ఓ’ అంటూ కేకలు వేస్తూ.. సినిమాపై తమ అభిమానాన్ని బయటపెడుతున్నారు.

ఈవిషయంపై తాజాగా నటుడు రిషబ్‌ శెట్టి స్పందించారు. ‘ఓ..’ అనేది కేవలం శబ్దం మాత్రమే కాదని.. అది తమకు ఓ సెంటిమెంట్‌ అని అన్నారు. ‘‘కాంతార’ వీక్షించిన ప్రేక్షకులందరికీ నా చిరు విన్నపం. సినిమాలో ఉపయోగించిన శబ్దాలను అనుకరించొద్దు. ఇదొక ఆచారం, ఆధ్యాత్మిక నమ్మకం. అలాగే ఇది చాలా సున్నితమైన అంశం. దీనివల్ల ఆచారం దెబ్బతినొచ్చు’’ అని ఆయన పేర్కొన్నారు.