Ritika Singh: అందుకే షూటింగ్‌ మధ్యలో ఏడ్చేశాను.. భరించలేకపోయా: రితికా సింగ్‌

హైదరాబాద్‌: ‘గురు’ సినిమాలో తన నటనతో ప్రేక్షకుల మనసు దోచేసింది హీరోయిన్‌ రితికా సింగ్‌ (Ritika Singh). తెలుగుతో పాటు తమిళంలోనూ వరస సినిమాలు చేస్తూ అలరిస్తోంది. ఆమె ప్రధాన పాత్రలో నటించిన చిత్రం ‘ఇన్‌కార్‌ (InCar)’. యథార్థ సంఘటన ఆధారంగా ఈ చిత్రం ఐదు భాషల్లో తెరకెక్కింది. తాజాగా ఏర్పాటు చేసిన మీడియా సమావేశంలో రితికా మాట్లాడుతూ.. ఈ సినిమా తనకెంతో ప్రత్యేకమని చెప్పింది.

‘‘ఈ సినిమా అంతా ఒకే రోజులో జరిగే కథ. ఓ అమ్మాయిని సాయంత్రం కిడ్నాప్‌ చేస్తారు. రాత్రి సమయానికల్లా తనకు ఏం జరిగింది.. కిడ్నాపర్ల నుంచి బయటపడిందా లేదా? అనేది కథ. నేను సినిమా ప్రారంభంలో ఏ కాస్ట్యూమ్స్‌ అయితే వేసుకున్నానో.. చివరి వరకూ అవే కొనసాగించాలి. దాని కోసం ఎంతో కష్టపడ్డాను. నా పాత్రకు ఎంతో కనెక్ట్‌ అయ్యాను. ఒక సీన్‌ అయ్యాక దర్శకుడు కట్‌ చెప్పగానే.. బాగా ఏడ్చేశాను. ఎందుకంటే ఆ సన్నివేశంలో నా పాత్రను అంతా తిడతారు. దానిని నేను భరించలేకపోయాను. అది నాకు చాలా కష్టంగా అనిపించింది. అందుకే షూటింగ్‌ అయ్యాక.. కారు దిగి కాసేపు ఒంటరిగా గడిపాను’’ అని చెప్పింది. 

అయితే.. ఈ మీడియా సమావేశానికి రితికా మూడు గంటలు ఆలస్యంగా రావడంపై పలువురు ఆమెపై అసంతృప్తి వ్యక్తం చేశారు. దీంతో ఆమె వారికి క్షమాపణలు చెప్పింది. కావాలని ఆలస్యంగా రాలేదని.. సమాచారం సరిగ్గా అందకపోవడంతో ఇలా జరిగిందని వాళ్లకు వివరణ ఇచ్చింది.