Priyanka Nalkari: సీక్రెట్‌గా పెళ్లి చేసుకున్న నటి.. తెలుగులో ఏయే సినిమాలు చేసిందంటే?

హైదరాబాద్‌: తెలుగు ప్రేక్షకులకు సుపరిచతమైన నటి ప్రియాంక నల్కారి (Priyanka Nalkari) సీక్రెట్‌గా పెళ్లి చేసుకుంది. తన ప్రేమికుడు రాహుల్‌ వర్మ (Rahul Varma) తో గుట్టుచప్పుడు కాకుండా ఏడడుగులు వేసింది. మలేషియాలోని ఓ ఆలయంలో వీళ్లిద్దరూ వివాహం చేసుకున్నారు. ఈ ఫొటోలను ప్రియాంక తన సోషల్‌మీడియా ఖాతాల్లో పోస్ట్‌ చేసింది. దీంతో నెటిజన్లు, అభిమానులు ఈ కొత్త జంటకు శుభాకాంక్షలు చెబుతుండగా ఫొటోలు వైరలవుతున్నాయి. ప్రియాంక పెళ్లి చేసుకున్న రాహుల్‌ వర్మ ఓ వ్యాపారవేత్త. అతను కూడా పలు సీరియల్స్‌లో కనిపించారు. ప్రియాంక, రాహుల్‌ వర్మ ఇద్దరూ ఓ తమిళ సీరియల్‌లో కలిసి నటించారు. ఆ సమయంలోనే వీళ్లిద్దరూ ప్రేమలో పడ్డారు. 

ఇక ప్రియాంక 2010లో విడుదలైన శర్వానంద్‌ ‘అందరి బంధువయ’ (Andari Bandhuvaya) సినిమాతో వెండితెరకు పరిచయమైంది. ఆ తర్వాత ‘కాంచన3’ (Kanchana 3), ‘కిక్‌2’ (Kick 2) వంటి పలు సినిమాల్లో కనిపించి అలరించింది.  బుల్లితెరపై కూడా ప్రియాంక తనదైన ముద్ర వేసుకుంది. తెలుగు, తమిళ సీరియల్స్‌లో ప్రధాన పాత్రలో నటించింది. తమిళంలో ప్రసారమైన ‘రోజా’ సీరియల్‌ ఆమెకు మంచి పేరు తీసుకువచ్చింది. కొన్ని కార్యక్రమాల్లో యాంకర్‌గానూ వ్యవహరించి మెప్పించింది.  అలాగే గెటప్‌ శ్రీనుతో కలిసి ప్రత్యేక ఈవెంట్‌లలో అలరించింది.