RRR: ఎదురుచూపులకు ఫుల్‌స్టాప్‌.. ఓటీటీలో ‘ఆర్‌ఆర్‌ఆర్‌’ వచ్చేస్తోంది..!

హైదరాబాద్‌: ప్రపంచవ్యాప్తంగా ఉన్న సినీ ప్రియుల ఎదురుచూపులకు ఫుల్‌స్టాప్‌ పడింది. వాళ్లందరూ ఎన్నో రోజుల నుంచి ఎదురుచూస్తోన్న ‘ఆర్‌ఆర్‌ఆర్‌’ డిజిటల్‌ ప్రిమియర్‌కు రంగం సిద్ధమైంది. ప్రముఖ ఓటీటీ ఫ్లాట్‌ఫామ్‌లో మరో వారం రోజుల్లో ఈ సినిమా ప్రేక్షకులకు అందుబాటులో ఉండనుంది. రామ్‌చరణ్‌-తారక్‌ ప్రధాన పాత్రధారులుగా దర్శకధీరుడు రాజమౌళి తెరకెక్కించిన బిగ్గెస్ట్‌ యాక్షన్‌ ఎంటర్‌టైనర్‌ ‘ఆర్‌ఆర్‌ఆర్‌’. మార్చిలో ప్రేక్షకుల ముందుకు వచ్చిన ఈ చిత్రం బాక్సాఫీస్‌ రూ.1000 కోట్ల పైగా వసూళ్లు రాబట్టి కలెక్షన్స్‌ సునామీ సృష్టించింది. ఒకే పరిశ్రమకు చెందిన ఇద్దరు స్టార్‌ హీరోలు కలిసి తెరపంచుకోవడంతో ఈ చిత్రాన్ని మళ్లీ మళ్లీ చూడాలనుకునేవారి సంఖ్య పెరిగింది. దీంతో ఓటీటీ రిలీజ్‌ కోసం అందరూ ఎంతో ఆతృతగా ఎదురుచూస్తున్నారు. ఈ క్రమంలో తాజాగా ప్రముఖ ఓటీటీ ఫ్లాట్‌ఫామ్‌ జీ5.. ‘ఆర్‌ఆర్‌ఆర్‌’ డిజిటల్‌ ప్రిమియర్‌ డేట్‌ని ప్రకటించింది. మే 20 నుంచి తెలుగు, తమిళ, కన్నడ, మలయాళీ భాషల్లో ‘ఆర్‌ఆర్‌ఆర్‌’ తమ ఫ్లాట్‌ఫామ్‌ వేదికగా అందుబాటులోకి రానుందని తెలిపింది. ఈ ప్రకటనతో నెటిజన్లు హర్షం వ్యక్తం చేస్తున్నారు. ‘ఆర్‌ఆర్‌ఆర్‌’ వచ్చేస్తోంది అంటూ తమ సంతోషాన్ని నెట్టింట్లో పంచుకుంటున్నారు. మరోవైపు అదేరోజున తారక్‌ పుట్టినరోజు కూడా ఉండటంతో ‘ఆర్‌ఆర్‌ఆర్‌’ ఓటీటీ రిలీజ్‌.. తమకి మరింత స్పెషల్‌ అని ఎన్టీఆర్‌ అభిమానులు అంటున్నారు.