RRR: ఆరోజే ‘ఆర్‌ఆర్‌ఆర్‌’ ప్రీ రిలీజ్‌ ఈవెంట్‌.. ఎక్కడంటే?

ఇంటర్నెట్‌ డెస్క్‌: యావత్‌ సినీ అభిమానులంతా ఎంతో ఆసక్తిగా ఎదురుచూస్తున్న ‘ఆర్‌ఆర్‌ఆర్‌’ చిత్రం మార్చి 25న విడుదలకానుంది. ఈ సందర్భంగా ప్రీ రిలీజ్‌ ఈవెంట్‌ను ఈనెల 19న నిర్వహిస్తున్నట్టు చిత్ర బృందం ప్రకటించింది. ఈ మేరకు ఎన్టీఆర్‌, రామ్‌చరణ్‌ కలిసి ఉన్న కొత్త పోస్టర్‌ను విడుదల చేసింది. ఈ వేడుకకు కర్ణాటకలోని అగలగుర్కి (చిక్కబల్లాపుర) వేదికకానుంది. ఈ పాన్‌ ఇండియా సినిమా ఇప్పటికే విడుదల కావాల్సిఉండగా కొవిడ్‌ కారణంగా వాయిదా పడుతూ వచ్చింది. ఈ ఏడాది సంక్రాంతికి విడుదల చేయాలని భావించిన నేపథ్యంలో చెన్నై, కేరళ, ముంబయిలో ముందస్తు విడుదల వేడుకలను చిత్ర బృందం పూర్తి చేసింది. ఇప్పుడు తెలుగు, కన్నడ ప్రేక్షకుల సమక్షంలో ఈవెంట్‌ను ఏర్పాటుచేస్తోంది.

దర్శకుడు రాజమౌళి రూపొందించిన ఈ సినిమాలో కొమురం భీమ్‌గా ఎన్టీఆర్‌, అల్లూరి సీతారామరాజుగా రామ్‌చరణ్‌ కనిపించనున్నారు. అలియా భట్‌, ఒలివియా మోరిస్‌ కథానాయికలు. శ్రియ, అజయ్‌ దేవ్‌గణ్‌, సముద్రఖని తదితరులు కీలక పాత్రలు పోషించారు. సుమారు రూ.400 కోట్లతో డీవీవీ దానయ్య నిర్మించిన ఈ సినిమాకు ఎం.ఎం. కీరవాణి సంగీతం అందించారు.