Pushpa 2: ‘పుష్ప-2’లో రామ్‌చరణ్‌.. స్క్రీన్‌పై మెరవనున్న బావా-బామ్మర్ది..?

ఇంటర్నెట్‌డెస్క్‌: ఐకాన్‌స్టార్‌ అల్లు అర్జున్ (Allu Arjun)‌, మెగా పవర్‌స్టార్‌ రామ్‌చరణ్‌ (Ram Charan).. వీరిద్దరూ ఒకే స్క్రీన్‌పై కనిపిస్తే చూడాలని మెగా అభిమానులు ఎంతగానో ఎదురుచూస్తున్నారు. ఇప్పటికే వీరిద్దరి కాంబోలో ‘ఎవడు’ వచ్చినప్పటికీ అందులో చరణ్‌-బన్నీ కలిసి కనిపించిన సన్నివేశాల్లేవు. తాజా సమాచారం ప్రకారం త్వరలోనే వీరిద్దరూ వెండితెరపై కలిసి సందడి చేయనున్నారని తెలుస్తోంది.  ఈ మేజికల్‌ కాంబోకు ‘పుష్ప-2’ (Pushpa 2) వేదిక కానుందని వార్తలు వస్తున్నాయి.

ఎర్రచందనం స్మగ్లింగ్‌ నేపథ్యంలో సుకుమార్‌ (Sukumar) తెరకెక్కించిన బ్లాక్‌బస్టర్‌ హిట్‌ ‘పుష్ప ది రైజ్‌’. బన్నీ హీరోగా తెరకెక్కిన ఈ సినిమా ప్రపంచవ్యాప్తంగా సూపర్‌ సక్సెస్‌ అందుకుంది. ప్రస్తుతం ఈ చిత్రానికి సీక్వెల్‌గా ‘పుష్ప ది రూల్‌’ తెరకెక్కుతోంది. అయితే ఈచిత్రానికి సంబంధించిన ఓ ఆసక్తికర విషయం ఇప్పుడు నెట్టింటిని షేక్‌ చేస్తోంది. పార్ట్‌-1తో పోలిస్తే.. పార్ట్‌-2 మరింత ఆసక్తికరంగా ఉండనుందని, ఇందులో ఎంతోమంది స్టార్స్‌ కనిపించనున్నారని సమాచారం. ఈ మేరకు రామ్‌చరణ్‌ సైతం ఈ సినిమాలో అతిథి పాత్రలో కనిపించనున్నారని, బన్నీతో కలిసి ఆయన స్క్రీన్‌ షేర్‌ చేసుకోనున్నారని.. నెట్టింట పోస్టులు దర్శనమిస్తున్నాయి. ఈ విషయంపై సుకుమార్‌ ఇప్పటికే చెర్రీని సంప్రదించినట్లు తెలుస్తోంది. అయితే ఈ వార్తలపై ఎలాంటి అధికారిక ప్రకటన వెలువడలేదు.

డైలాగ్‌ అదుర్స్‌ అప్పా..!

‘పుష్ప’లో పవర్‌ఫుల్‌ పంచ్‌ డైలాగ్‌లు, విభిన్నమైన స్టైల్‌లో మెప్పించారు అల్లు అర్జున్‌. ‘తగ్గేదే లే’, ‘పుష్ప అంటే ఫ్లవర్‌ అనుకుంటివా.. ఫైర్‌’.. ఇలా చెబుతూ వెళితే ఆ సినిమాలో ఎన్నో సంభాషణలు అభిమానులను అలరించాయి. దీంతో ‘పుష్ప-2’లోనూ పవర్‌ఫుల్‌ డైలాగ్స్‌ మెండుగా ఉండాలని ఫ్యాన్స్‌ కోరుకుంటున్నారు. ఈ నేపథ్యంలోనే ఈ సినిమాకు సంబంధించిన ఓ డైలాగ్‌ ఇప్పుడు నెట్టింట తెగ చక్కర్లు కొడుతోంది. ‘‘అడవిలో జంతువులు నాలుగు అడుగులు వెనక్కి వేశాయంటే పులి వచ్చిందని అర్థం. అదే పులి నాలుగు అడుగులు వెనక్కి వేసింది అంటే పుష్పరాజ్‌ వచ్చాడని అర్థం’’. ప్రస్తుతం ఈ డైలాగ్‌ సినీ ప్రియులతో ఈలలు వేయిస్తోంది.