RRR: హైదరాబాద్‌ చేరుకున్న ‘ఆర్‌ఆర్‌ఆర్‌’ టీమ్‌.. రాజమౌళిని చుట్టుముట్టిన అభిమానులు

హైదరాబాద్‌: ‘ఆస్కార్‌’ (oscars 2023) అవార్డు సాధించిన అనంతరం ‘ఆర్‌ఆర్‌ఆర్‌’ (RRR) బృందం తిరిగి హైదరాబాద్‌కు చేరుకుంది. శుక్రవారం తెల్లవారుజామున శంషాబాద్‌లోని విమానాశ్రయానికి చేరుకున్న రాజమౌళి (Rajamouli), ఆయన సతీమణి రమ, కీరవాణి (Keeravani), ఆయన సతీమణి వల్లి, కార్తికేయ, కాలభైరవ, శ్రీసింహా, తదితరులుకు అభిమానులు ఘన స్వాగతం పలికారు. రాజమౌళి, కీరవాణితో ఫొటోలు దిగేందుకు వారు ఆసక్తి కనబరిచారు. దీంతో ఎయిర్‌పోర్ట్‌ ప్రాంగణం రద్దీగా మారింది. కట్టు దిట్టమైన భద్రత నడుమ కీరవాణి, రాజమౌళి ఎయిర్‌పోర్ట్‌ నుంచి బయటకు వచ్చారు. మరోవైపు ‘ఆర్‌ఆర్‌ఆర్‌’ టీమ్‌తో మాట్లాడేందుకు పలువురు విలేకర్లు ప్రయత్నించగా.. ‘జైహింద్‌’ అంటూ రాజమౌళి అక్కడి నుంచి వెళ్లిపోయారు. ప్రస్తుతం దీనికి సంబంధించిన విజువల్స్‌ నెట్టింట అందరి దృష్టిని ఆకర్షిస్తున్నాయి.

దేశ రాజధానికి చరణ్‌..!

నటుడు రామ్‌చరణ్‌ (Ram Charan) సైతం శుక్రవారం స్వదేశానికి రానున్నారు. అయితే ఆయన నేరుగా హైదరాబాద్‌కు రావడం లేదు. ఈ రోజు సాయంత్రం వరకూ ఆయన దేశ రాజధాని దిల్లీలో ఉండనున్నారు. ఉదయం ‘ఇండియా టుడే కాన్‌క్లేవ్‌’లో అతిథిగా పాల్గొననున్నారు. సాయంత్రం ప్రధాని నరేంద్రమోదీతో సమావేశం కానున్నారు. ఈ రోజు రాత్రికి ఆయన హైదరాబాద్‌కు వచ్చే అవకాశం ఉందని అభిమానులు తెలిపారు. చరణ్‌కు ఘన స్వాగతం పలికేందుకు ఫ్యాన్స్‌ ఏర్పాట్లు చేస్తున్నారు.