Saipallavi: కూలీగా మారిన స్టార్‌హీరోయిన్‌.. ఫొటోలు వైరల్‌

చెన్నై: తెలుగు, తమిళం, మలయాళంలో వరుస అవకాశాలు దక్కించుకుంటూ స్టార్‌ హీరోయిన్‌గా పేరుతెచ్చుకున్న ఓ నటి కూలీగా మారి పొలంలోకి అడుగుపెట్టారు. దీంతో అక్కడే ఉన్న మహిళా కూలీలందరూ ఆశ్చర్యపోయారు. ఇంతకీ ఆ నటి ఎవరంటే.. సాయిపల్లవి. ‘ప్రేమమ్‌’తో కథానాయికగా ఎంట్రీ ఇచ్చిన ఈ నేచురల్‌ బ్యూటీ ‘భానుమతి సింగిల్‌ పీస్‌’ అంటూ తెలుగు వారికి చేరువై ఇక్కడి వారినీ ‘ఫిదా’ చేసింది. దీంతో ఆమెకు తెలుగులో వరుస అవకాశాలు వస్తున్నప్పటికీ.. తనకు నప్పే కథలు మాత్రమే ఎంచుకుంటూ కెరీర్‌లో దూసుకెళ్తున్నారు. ఇటీవల ‘శ్యామ్‌ సింగరాయ్‌’తో అలరించిన సాయి ప్రస్తుతం షూట్‌ నుంచి కాస్త విరామం తీసుకున్నారు. ఉగాది పర్వదినాన్ని పురస్కరించుకుని ఆమె రైతుగా అవతారమెత్తి వ్యవసాయ పనులు చేశారు. మిగతా కూలీలతో కలిసి పంట కోత పనుల్లో నిమగ్నమయ్యారు. ఈ ఫొటోలను సాయిపల్లవి ఇన్‌స్టా వేదికగా షేర్‌ చేయడంతో వైరల్‌గా మారాయి. వాటిని చూసిన పలువురు తారలు ఆమెను మెచ్చుకుంటున్నారు. ‘‘సాయిపల్లవి.. నీలా ఎవ్వరూ ఉండలేరు’’ అని నటి శ్రద్ధా శ్రీనాథ్‌ ప్రశంసించారు.