Adipurush: ‘ఆదిపురుష్‌’తో ‘సలార్‌’ గ్లింప్స్‌?

ప్రభాస్‌ (Prabhas) - ప్రశాంత్‌ నీల్‌ (Prasanth Neel) కలయికలో తెరకెక్కుతున్న భారీ యాక్షన్‌ చిత్రం ‘సలార్‌’ (Salaar). హోంబలే ఫిల్మ్స్‌ సంస్థ నిర్మిస్తోంది. శ్రుతిహాసన్‌ కథానాయిక. పృథ్వీరాజ్‌ సుకుమారన్‌, జగపతిబాబు కీలక పాత్రలు పోషిస్తున్నారు. ఈ సినిమా సెప్టెంబర్‌ 28న థియేటర్లలోకి రానున్న సంగతి తెలిసిందే. ఈ నేపథ్యంలోనే ప్రచార కార్యక్రమాల్ని వేగవంతం చేసే ప్రయత్నం చేస్తోంది చిత్ర బృందం. ఇందులో భాగంగా ఈ చిత్ర గ్లింప్స్‌ను విడుదల చేసేందుకు సన్నాహాలు చేస్తున్నట్లు తెలిసింది. జూన్‌ 16న రానున్న ప్రభాస్‌ ‘ఆదిపురుష్‌’ (Adipurush) చిత్రంతో పాటే ‘సలార్‌’ ప్రచార చిత్రాన్ని విడుదల చేయనున్నారని సమాచారం. ఇక ఈ సినిమాలో మరో కీలకమైన ప్రతినాయక పాత్రను సౌరవ్‌ లోకేష్‌ పోషిస్తున్నట్లు తెలిసింది. అలాగే విశాల్‌ ‘పొగరు’ చిత్రంలో ప్రతినాయికగా నటించిన శ్రియా రెడ్డి ఈ సినిమాలో ఓ శక్తిమంతమైన పాత్రలో సందడి చేయనుంది. ఈ విషయాన్ని చిత్ర బృందం శుక్రవారం సామాజిక మాధ్యమాల ద్వారా ప్రకటించింది. ఈ సినిమాకి సంగీతం: రవి బస్రూర్‌, ఛాయాగ్రహణం: భువన్‌ గౌడ.