salaar: ‘సలార్‌’ మరో షెడ్యూల్‌కు రెడీ అవుతున్నారా?

ఇంటర్నెట్‌డెస్క్‌: ‘కేజీయఫ్‌2’ విజయంతో మంచి జోరుమీదున్నారు దర్శకుడు ప్రశాంత్‌ నీల్‌. ఇటీవల ప్రేక్షకుల ముందుకు వచ్చిన ఈ సినిమా బాక్సాఫీస్‌ వద్ద ఘన విజయాన్ని సొంతం చేసుకుంది. కన్నడ, తెలుగు చిత్ర పరిశ్రమలోనే కాదు, హిందీలో తన హవా చూపిస్తోంది. ఈ క్రమంలో అందరి దృష్టి ప్రభాస్‌ కథానాయకుడిగా నటిస్తున్న ‘సలార్‌’పైనే పడింది.  ప్రశాంత్‌ నీల్‌ తమ అభిమాన హీరోను ఎలా చూపిస్తారా? అని ఆసక్తిగా ఎదురు చూస్తున్నారు. ఈ సినిమాకు సంబంధించి తదుపరి షెడ్యూల్‌కు రంగం సిద్ధం చేసినట్లు తెలుస్తోంది. మే మొదటి వారంలో చిత్రీకరణ చేయనున్నారట. సింహభాగం ఈ షెడ్యూల్‌లోనే పూర్తి చేయాలని ప్రశాంత్‌ నీల్‌ భావిస్తున్నారు. ముఖ్యంగా టాకీ పార్ట్ అంతా పూర్తి చేస్తే, వేసవి తగ్గాక, యాక్షన్‌ సీక్వెన్స్‌ ప్లాన్‌ చేయాలని భావిస్తున్నారట. ఇందుకు సంబంధించిన వివరాలు త్వరలోనే వెల్లడయ్యే అవకాశం ఉంది. శ్రుతిహాసన్‌ కథానాయికగా నటిస్తున్న ఈ చిత్రానికి రవి బస్రూర్‌ సంగీతం అందిస్తున్నారు. యాక్షన్‌ చిత్రంగా ‘సలార్‌’ తెరకెక్కనుంది.  బొగ్గు గనుల నేపథ్యంలో సినిమా తెరకెక్కనుంది.