Godfather: థియేటర్‌లోనే టపాసులు కాల్చిన సల్మాన్‌ ఫ్యాన్స్‌.. పరుగులు తీసిన ప్రేక్షకులు

ముంబయి: చిరంజీవి, సల్మాన్‌ ఖాన్‌ కలసి నటించిన ‘గాడ్‌ఫాదర్‌’ (Godfather) బాలీవుడ్‌లో మంచి టాక్‌ అందుకున్న విషయం తెలిసిందే. ఈ సినిమా స్క్రీనింగ్‌లో సల్మాన్‌ ఖాన్‌ (Salman Khan) అభిమానులు అత్యుత్సాహం ప్రదర్శించారు. థియేటర్‌లోనే టపాసులు కాల్చి హడావుడి చేశారు. దీనికి సంబంధించిన వీడియోలు నెట్టింట వైరల్‌గా మారాయి.

మహారాష్ట్రలోని మాలేగావ్‌లోని ఓ థియేటర్‌లో ‘గాడ్‌ఫాదర్‌’ ప్రదర్శిస్తున్నారు. సినిమాలో ‘తార్‌మార్‌...’ పాట ప్లే అవుతోన్న సమయంలో కొంతమంది అభిమానులు థియేటర్‌లోనే టపాసులు కాల్చారు. దీంతో ప్రేక్షకులు అక్కడి నుంచి పరుగులు తీశారు. ఆ వీడియోలను చూసిన నెటిజన్లు.. ‘‘ఇదెక్కడి మాస్‌ సామీ’’ అంటూ కామెంట్లు చేస్తున్నారు. మరికొందరేమో ఇలాంటి పనులు మంచివి కావు అని కామెంట్స్‌ చేస్తున్నారు. 

సల్మాన్‌ నటించిన ‘అంతిమ్‌’ విడుదలైనప్పుడూ అభిమానులు ఇలాంటి చర్యలకే పాల్పడ్డారు. విషయం తెలుసుకున్న సల్మాన్‌.. ఇలాంటి పనులు వద్దని అప్పట్లో విజ్ఞప్తి చేశారు. కానీ అభిమానులు వినకుండా ఇప్పుడు ‘గాడ్‌ఫాదర్‌’ విషయంలోనూ అదే పని చేశారు. ఇక ‘లూసిఫర్‌’కు రీమేక్‌ అయిన ‘గాడ్‌ఫాదర్‌’ సల్మాన్‌ ఖాన్‌ మసూం భాయ్‌ పాత్రలో ప్రత్యేక ఆర్షణగా నిలిచారు. దీంతో ఈ చిత్రానికి బాలీవుడ్‌లోనూ మంచి రెస్పాన్స్‌ లభిస్తోంది.