Samantha: సెర్బియా క్లబ్‌లో సమంత డ్యాన్స్‌.. వీడియో వైరల్‌

ఇంటర్నెట్‌డెస్క్‌: ‘ఊ అంటావా మావా ఊఊ అంటావా మావా’.. ఇంటర్నెట్‌ను షేక్‌ చేసిన ఈ పాట, సమంత డ్యాన్స్‌ను సినీ ప్రియులు ఎప్పటికీ మర్చిపోలేరు. సెలబ్రిటీల నుంచి సినీ ప్రేమికుల వరకూ ఈ పాటకు ఫిదా అయ్యారు. అంతటి సెన్సేషన్‌ క్రియేట్‌ చేసిన ఈ పాటకు తాజాగా సమంత (Samantha) డ్యాన్స్‌ చేశారు. ‘సిటడెల్‌’ (Citadel) (ఇండియన్‌ వెర్షన్‌) షూట్‌ కోసం సెర్బియా వెళ్లిన ఆమె.. ఓ క్లబ్‌లో సరదాగా స్టెప్పులు వేశారు. అక్కడే ఉన్న బాలీవుడ్‌ నటుడు వరుణ్‌ ధావన్‌ ఆమెను డ్యాన్స్‌ చేయమంటూ ప్రోత్సహించారు. దీనికి సంబంధించిన ఓ వీడియో నెట్టింట వైరల్‌గా మారింది. దీనిని చూసిన నెటిజన్లు.. ‘పాట వచ్చి రెండేళ్లు అవుతున్నా క్రేజ్‌ ఏమాత్రం తగ్గలేదు’ అంటూ కామెంట్స్‌ చేస్తున్నారు.

‘శాకుంతలం’ తర్వాత సమంత నటిస్తున్న యాక్షన్‌ ప్యాక్డ్‌ ఎంటర్‌టైనర్‌ వెబ్‌సిరీస్‌ ‘సిటడెల్‌’. రాజ్‌ అండ్‌ డీకే దీన్ని తెరకెక్కిస్తున్నారు. వరుణ్‌ ధావన్‌ - సామ్‌ ప్రధాన పాత్రల్లో నటిస్తున్న ఈ సిరీస్‌ ప్రస్తుతం చిత్రీకరణ దశలో ఉంది. ఇండియాలో ఓ షెడ్యూల్‌ పూర్తి చేసుకున్న ఈ టీమ్‌.. కొత్త షెడ్యూల్‌ కోసం ఇటీవల సెర్బియా వెళ్లింది. బెల్గ్రేడ్‌లో షూట్‌ పూర్తైన వెంటనే టీమ్‌ మొత్తం కలిసి ఓ క్లబ్‌కు వెళ్లి సరదాగా గడిపారు. ఈ సమయంలోనే క్లబ్‌లో ‘ఊ అంటావా మావా’ పాటను ప్లే చేయగా సామ్‌ డ్యాన్స్‌ చేశారు. ఇక, ప్రియాంకా చోప్రా నటించిన ‘సిటడెల్‌’కు ప్రీక్వెల్‌గా ఈ సిరీస్‌ తెరకెక్కుతున్నట్లు సమాచారం. ప్రియాంకకు తల్లిదండ్రులుగా సామ్‌-వరుణ్‌ కనిపించనున్నారని ప్రచారం జరుగుతోంది.