Samantha: ఆ హీరో దర్శకత్వంలో నటించేందుకు సమంత గ్రీన్‌సిగ్నల్‌...!

హైదరాబాద్‌: సినీరంగంలో ఉన్న ప్రతిభావంతులైన కథానాయికల్లో సమంత ఒకరు. తాజాగా యశోద సినిమాతో ప్రేక్షకుల ముందుకు వచ్చి అలరిస్తోంది. ఈ చిత్రం మంచి ప్రేక్షకాదరణ పొంది బాక్సాఫీస్‌ వద్ద భారీ వసూళ్లు సాధిస్తోంది. సరోగసి నేపథ్యంలో వచ్చిన ఈ సినిమాలో తన నటనతో అందరినీ ఆకట్టుకుంది సమంత. ప్రస్తుతం సమంత నటించనున్న తర్వాత చిత్రం గురించి అంతటా చర్చనడుస్తోంది. యశోద సక్సెస్‌ తర్వాత సామ్‌ మరో సినిమాకు గ్రీన్‌ సిగ్నల్‌ ఇచ్చినట్లు సమాచారం.

ప్రముఖ నటుడు, దర్శకుడు రాహుల్‌ రవీంద్రన్‌(Rahul Ravindran) సమంతకు ఓ స్టోరీ లైన్‌ వినిపించారని అంటున్నారు. అది ఆమెకు బాగా నచ్చిందని సినిమాకు గ్రీన్‌ సిగ్నల్‌ ఇచ్చిందని ఇండస్ట్రీలో టాక్‌. మొదట రాహుల్‌ ఈ కథను రష్మికకు వినిపించారని అయితే కొన్నికారణాల వల్ల ఆమె ఈ సినిమాలో నటించేందుకు అంగీకరించలేదని సమాచారం. దీంతో రాహుల్‌ కథలో కొన్ని మార్పులు చేసి సమంతకు చెప్పగా ఆమె వెంటనే ఓకే చేసిందట. అయితే ఇప్పటి వరకు అటు రాహుల్‌ కానీ ఇటు సమంత కానీ ఈ విషయాన్ని ధ్రువీకరించలేదు. ప్రస్తుతం సమంత సెన్సేషనల్‌ స్టార్‌ విజయ్‌ దేవరకొండతో కలిసి ఖుషి సినిమాలో నటిస్తోంది. శివ నిర్వాణ దర్శకత్వంలో ప్రేమకథా చిత్రంగా ఈ సినిమా రూపొందుతోంది.