Samantha: అదృష్టంగా భావిస్తా.. నెటిజన్‌కు సామ్‌ కౌంటర్‌

హైదరాబాద్‌: నాగచైతన్య నుంచి విడాకులు తీసుకున్న అనంతరం నటి సమంత నెట్టింట ఎన్నో విమర్శలు ఎదుర్కొన్నారు. తన ప్రవర్తనను తప్పుబడుతూ సోషల్‌మీడియా వేదికగా వచ్చిన కామెంట్స్‌పై ఆమె వీలునంతవరకూ స్పందించారు. వారందరికీ తనదైన శైలిలో సమాధానమిచ్చారు. కాగా, తాజాగా తన ఇష్టాయిష్టాలను అవహేళన చేస్తూ ఓ నెటిజన్ పెట్టిన ట్వీట్‌పై సామ్‌ స్ట్రాంగ్‌ కౌంటర్‌ ఇచ్చారు. అసలేం జరిగిందంటే..

సమంతకు మూగజీవాలంటే ఎంతో ఇష్టం. గత కొంతకాలం నుంచి ఆమె రెండు కుక్కపిల్లల్ని పెంచుకుంటున్నారు. తన పెంపుడు శునకాలతో దిగిన పలు ఫొటోలను సైతం ఆమె సోషల్‌మీడియా వేదికగా ఎన్నోసార్లు అభిమానులతో పంచుకున్నారు. జిమ్‌లో వర్కౌట్లు పూర్తైన తర్వాత వాటితో కలిసి దిగిన ఓ ఫొటోని తాజాగా సామ్‌ షేర్‌ చేశారు. ఆ ఫొటోపై స్పందించిన ఓ నెటిజన్‌.. ‘‘ఆమె ఒంటరిగా ఆ శునకాలు, పిల్లులతోనే చనిపోయేలా ఉంది’’ అని కామెంట్‌ చేయడంతో దానిపై సామ్‌ స్పందిస్తూ.. ‘‘నన్ను నేను అదృష్టవంతురాలిగా భావిస్తున్నా’’ అని సమాధానం ఇచ్చారు. సామ్‌ సమాధానమిచ్చిన కొంతసేపటికే ఆ నెటిజన్‌.. తాను చేసిన ట్వీట్‌ని డిలీట్‌ చేశాడు.