Samantha: సమంత ఆరోగ్యంపై మరోసారి రూమర్లు.. స్పందించిన టీమ్‌

హైదరాబాద్‌: ప్రముఖ సినీ నటి సమంత (Samantha) ఆరోగ్యం విషమించిందంటూ వస్తోన్న వార్తలపై ఆమె వ్యక్తిగత టీమ్‌ స్పందించింది. ప్రస్తుతం ఆమె ఆరోగ్యంగానే ఉన్నారని స్పష్టంచేసింది. సామ్‌ ఆరోగ్యంపై వస్తోన్న వార్తలను ఖండిస్తూ అవాస్తవాలను ప్రచారం చేయొద్దని విజ్ఞప్తి చేసింది. తాను మయోసైటిస్‌ అనే అరుదైన వ్యాధితో బాధపడుతున్నట్టు సమంత ఇటీవల ప్రకటించిన సంగతి తెలిసిందే. కొంచెం కష్టమైనా త్వరలోనే కోలుకుంటానని చెప్పారు. ఈ క్రమంలో తాజాగా ఆమె ఆరోగ్య పరిస్థితి విషమించిందని, చికిత్స కోసం విదేశాలకు వెళ్తున్నారంటూ పలు వెబ్‌సైట్లు, సోషల్‌ మీడియాలో ప్రచారం జరుగుతోంది. అయితే, తాజాగా సామ్‌ టీమ్‌ సమాధానంతో ఆ వదంతులకు చెక్‌ పడినట్టైంది. సమంత హెల్త్‌పై రూమర్లు రావడం ఇదే తొలిసారి కాదు. ‘సమంత ఆరోగ్యం బాలేదు.. ఆమె ఆస్పత్రిలో చేరారు’ అంటూ కొన్ని రోజుల క్రితం కూడా కథనాలు వచ్చాయి. 

మయోసైటిస్‌ వ్యాధితో బాధపడుతూనే ‘యశోద’ సినిమాలోని తన పాత్రకు డబ్బింగ్‌ చెప్పారు సమంత. హరి- హరీశ్‌ సంయుక్తంగా తెరకెక్కించిన ఈ సినిమా నవంబరు 11న ప్రేక్షకుల ముందుకొచ్చింది. సమంత నటనకు ఎప్పటిలానే మంచి ఆదరణ దక్కింది. ప్రస్తుతం.. విజయ్‌ దేవరకొండ సరసన ‘ఖుషి’ అనే సినిమాలో సమంత నటిస్తున్నారు.