Samantha: ‘శాకుంతలం’ సినిమాకు నా మనసులో ఎప్పటికీ ప్రత్యేకమైన స్థానం ఉంటుంది: సమంత

హైదరాబాద్‌: సమంత(Samantha) అభిమానులు ఎప్పుడెప్పుడా అని ఎదురుచూస్తోన్న సినిమా ‘శాకుంతలం’ (Shakuntalam). గుణశేఖర్‌ దర్శకత్వంలో సామ్‌ నటించిన ఈ సినిమాపై ఆమె ఫ్యాన్స్‌తో పాటు సినీ ప్రియులంతా ఆసక్తిగా ఉన్నారు. తాజాగా సమంత ఒక్క ట్వీట్‌తో అందరిలో జోష్‌ నింపింది. సినిమా చూశానని చెప్పిన సామ్‌ గుణశేఖర్‌కు ధన్యవాదాలు తెలిపింది.

‘‘ఇప్పుడే సినిమా చూశాను. గుణశేఖర్‌ గారు ఈ సినిమాను ఎంతో అందంగా తీర్చిదిద్దారు. ఒక గొప్ప ఇతిహాసానికి మనోహరంగా జీవం పోశారు. ఇందులోని భావోద్వేగాలు అందరికీ నచ్చుతాయి. చిన్న పిల్లలకు కూడా ఈ చిత్రం ఎంతో నచ్చుతుంది. ఈ సినిమాకు నా మనసులో ఎప్పటికీ ప్రత్యేకమైన స్థానం ఉంటుంది.  ఇంత మంచి చిత్రాన్ని ఆడియన్స్‌తో కలిసి చూడడం కోసం వెయిట్‌ చేస్తున్నాను’’ అని తెలుపుతూ చిత్ర నిర్మాతలకు కృతజ్ఞతలు చెప్పింది. కాళిదాసు రచించిన అభిజ్ఞాన శాకుంతలం ఆధారంగా ఈ చిత్రాన్ని తెరకెక్కించిన విషయం తెలిసిందే. శకుంతల, దుష్యంత మహారాజుల మధ్య ఉన్న ప్రేమ నేపథ్యంలో ఈ సినిమా సాగుతుంది. ఇందులో శకుంతల పాత్రను సమంత పోషించగా.. దుష్యంతుడి పాత్రలో దేవ్‌ మోహన్‌ నటించారు. మోహన్‌బాబు, మధుబాల, గౌతమి తదితరులు కీలక పాత్రలు పోషించారు. ఇప్పటికే విడుదలైన ఈ సినిమా ట్రైలర్‌, పోస్టర్‌లకు మంచి ప్రేక్షకాదరణ వచ్చింది.