రాగిణి, సంజనా.. అన్ని ఆస్తులు ఎక్కడివి?

సంబరగిపైనా కేసు

మాదకద్రవ్యాల వినియోగం, సరఫరాలతో సంబంధం ఉందని ఆరోపణలతో వెలుగులోకి వచ్చిన న్యాయవాది ప్రశాంత్‌ సంబరగి విచారణకు హాజరు కావాలని నోటీసు ఇచ్చినట్లు పోలీస్‌ శాఖ సంయుక్త కమిషనర్‌ సందీప్‌పాటిల్‌ తెలిపారు. సీసీబీ అధికారుల ఎదుట శనివారం హాజరు కావాలని నోటీసు జారీ చేశారు. మరోవైపు చామరాజపేట శాసనసభ్యుడు జమీర్‌ అహ్మద్‌ఖాన్‌ ఫిర్యాదు ఆధారంగా చామరాజపేట పోలీసులు సంబరగిపై ఎఫ్‌ఐఆర్‌ దాఖలు చేశారు. జమీర్‌ పరువు నష్టం దావా వేయడమేగాక.. సంబరగి బెదిరింపులకు పాల్పడుతున్నట్లు పోలీసుఠాణాలో ఫిర్యాదు చేశారు. దానిపై పోలీసులు విచారణ చేపట్టారు.

కస్టడీలోనే రాగిణి

బెంగళూరు (శివాజీనగర) : మాదక ద్రవ్యాల వినియోగం, విక్రయాలకు సంబంధించి అరెస్టయిన నటీమణి రాగిణి ద్వివేది జామీను కోసం దాఖలు చేసిన విచారణను ఏసీఎంఎం న్యాయస్థానం సోమవారానికి వాయిదా వేసింది. జామీను కోసం ముంబయికి చెందిన న్యాయవాదులను రాగిణి తల్లిదండ్రులు నియమించారు. గతంలో ఒకసారి దాఖలుచేసిన అర్జీని 33వ సీసీిహెచ్‌ న్యాయస్థానం తోసిపుచ్చింది.

♦ మాదక ద్రవ్యాల కేసులో అరెస్టయిన కథానాయికలు రాగిణి, సంజనలను వీడియో కాన్ఫరెన్సు ద్వారా వసంతనగర సమీపంలోని ప్రత్యేక న్యాయస్థానం ముందు పోలీసులు హాజరు పరిచారు. ఇప్పటి వరకు నిర్వహించిన విచారణకు వీరిద్దరూ సహకరించలేదని, మరో వారం పాటు వారిద్దరినీ తమ కస్టడీకి అప్పగించాలని దర్యాప్తు అధికారులు కోరారు. వారికీ- మాదక ద్రవ్యాలకూ సంబంధం ఉందని పలు ఆధారాలు ఇప్పటికే స్వాధీనపరుచుకున్నామని, వాటి గురించి అడిగిన ప్రశ్రలకూ వారు బదులివ్వడం లేదని పోలీసుల తరఫు న్యాయవాదులు కోర్టుకు విన్నవించారు. వారి వాదనలను పరిగణనలోకి తీసుకున్న న్యాయమూర్తి సోమవారం వరకు వారిద్దరినీ సీసీబీ పోలీసుల కస్టడీకి అప్పగిస్తూ ఆదేశాలు జారీ చేశారు. రాగిణి కస్టడీ శుక్రవారం సాయంత్రానికి ముగియగా, సంజన కస్టడీ శనివారం సాయంత్రానికి ముగియనుంది. రెండో శనివారం న్యాయస్థానాలకు సెలవు ఉన్న నేపథ్యంలో ఆమెనూ న్యాయస్థానం ముందు హాజరు పరిచారు.

♦ మాదక ద్రవ్యాల కేసులో అరెస్టయిన ప్రశాంత్‌ రాంకా, లూమ్‌, రవిశంకర్‌, రాగిణి, రాహుల్‌, నియాజ్‌ల పోలీసు కస్టడీని సోమవారం వరకు ఒకటో ఏసీఎంఎం న్యాయస్థానం పొడిగించింది. నిందితులను వీడియో కాన్ఫరెన్సు విధానంలో న్యాయస్థానం ముందు హాజరుపరిచారు. వీరెవరూ జామీను కోసం ఇప్పటికీ దరఖాస్తు చేసుకోలేదు. విచారణ కొనసాగించవలసిన నేపథ్యంలో కస్టడీని పొడిగించాలని పోలీసుల తరుఫు న్యాయవాది విన్నపాన్ని న్యాయస్థానం పరిగణనలోకి తీసుకుంది.