Oscars: ఆస్కార్‌కు అలియా సినిమా..!

బీటౌన్‌లో కొత్త ప్రచారం.. బ్యూటీని మెచ్చుకుంటూ పోస్టులు

ముంబయి: సినీ ప్రపంచంలో ప్రతిష్ఠాత్మకంగా భావించే ‘ఆస్కార్‌’ (Oscar) వేదికపై ఈసారి భారతదేశం నుంచి పోటీ గట్టిగానే ఉండనున్నట్లు తెలుస్తోంది. రాజమౌళి తెరకెక్కించిన ‘ఆర్‌ఆర్‌ఆర్’ (RRR) ఈ ఏడాది ఆస్కార్‌ బరికి నామినేట్‌ అయ్యే అవకాశం ఉందని ప్రముఖ హాలీవుడ్‌ మ్యాగజైన్‌ వెరైటీ జోస్యం చెప్పగా.. ఇప్పుడు, మరో బీటౌన్‌ సినిమా పేరూ వినిపిస్తోంది. అలియా భట్‌ ప్రధాన పాత్రలో నటించిన ఓ సినిమా ఈసారి ఆస్కార్‌ రేసులో ఉండే అవకాశం ఉందని బాలీవుడ్‌ మీడియా కోడైకూస్తోంది. ఇంతకీ ఆ సినిమా ఏమిటి? దాని విశేషాలేమిటి?

ముంబయి మాఫియా క్వీన్‌ గంగూబాయి జీవితాన్ని ఆధారంగా చేసుకుని తెరకెక్కిన చిత్రం ‘గంగూబాయి కతియావాడి’ (Gangubai Kathiawadi). గంగూబాయిగా అలియా నటించారు. సంజయ్‌ లీలా భన్సాలీ దర్శకత్వం వహించిన ఈ సినిమా 2022 ఆరంభంలో విడుదలై మంచి టాక్‌ అందుకుంది. అలియా నటనకు సినీ విమర్శకులు సైతం ఫిదా అయ్యారు. విదేశాల్లోనూ ఈ సినిమా మంచి వసూళ్లు రాబట్టింది. ఇక, బెర్లిన్‌ ఫిల్మ్ ఫెస్టివల్‌లో దీన్ని ప్రదర్శించగా ప్రేక్షకులందరూ కరతాళధ్వనులతో ప్రశంసించారు. ఈ నేపథ్యంలోనే ‘గంగూబాయి కతియావాడి’ ఆస్కార్‌కు వెళ్లే అవకాశం ఉందంటూ బాలీవుడ్‌ మీడియాలో తాజాగా వార్తలు వస్తున్నాయి. అలియా నటన, విదేశాల్లో సినిమాకు లభించిన గుర్తింపు.. ఇలాంటి అంశాలు అందుకు దోహదపడుతున్నాయని ఆయా కథనాల్లోని సమాచారం. ఈ వార్తలు చూసిన అలియా అభిమానులు ఆమెను మెచ్చుకుంటూ పోస్టులు పెడుతున్నారు. ఇక, సంజయ్‌ లీలా భన్సాలీ రూపొందించిన ‘దేవదాస్‌’ గతంలో ఆస్కార్‌కు నామినేట్‌ అయిన విషయం తెలిసిందే.