Sarkaru Vaari Paata: ‘సర్కారువారి పాట’ టికెట్‌ ధరల పెంపు.. తెలంగాణలో ఎంతంటే?

హైదరాబాద్‌: మహేశ్‌బాబు (Mahesh babu) కథానాయకుడిగా పరశురామ్‌ దర్శకత్వంలో తెరకెక్కిన యాక్షన్‌, కామెడీ చిత్రం ‘సర్కారువారి పాట’ (Sarkaru Vaari Paata). కీర్తి సురేశ్‌ (keerthy suresh) కథానాయిక. అన్ని కార్యక్రమాలు పూర్తి చేసుకున్న ఈ సినిమా మే 12న ప్రేక్షకుల ముందుకు రానుంది. ఈ సందర్భంగా తెలంగాణలో టికెట్‌ ధరలు పెంచుకోవడంతోపాటు అదనపు షోలకు రాష్ట్ర ప్రభుత్వం అనుమతినిచ్చింది. మల్టీప్లెక్స్‌లు, సింగిల్‌ స్క్రీన్‌ థియేటర్లలో రూ. 50, ఎయిర్‌ కండిషన్‌ సాధారణ థియేటర్లలో రూ.30 పెంచుకునేందుకు అవకాశం కల్పించింది. ఈ ఉత్తర్వులు ఈ నెల 12 నుంచి 7 రోజులపాటు అమల్లో ఉండనున్నాయి.

భారీ బడ్జెట్‌ చిత్రాల విడుదల సమయంలో టికెట్‌ ధరలు పెంచుకునేందుకు అవకాశం కల్పిస్తూ ప్రభుతాలు ఉత్తర్వులు జారీ చేసిన సంగతి తెలిసిందే. ఇప్పటికే ఈ సినిమా విషయంలో ఆంధ్రప్రదేశ్‌ ప్రభుత్వం గ్రీన్‌ సిగ్నల్‌ ఇచ్చిన సంగతి తెలిసిందే. మైత్రీ మూవీ మేకర్స్‌ నిర్మించిన ఈ ప్రాజెక్టుకు తమన్‌ సంగీత దర్శకుడు. సముద్ర ఖని, వెన్నెల కిశోర్‌ తదితరులు కీలక పాత్రలు పోషించారు. ఇప్పటికే విడుదలైన ప్రచార చిత్రాలు, పాటలు సినిమాపై అంచనాలను పెంచుతున్నాయి.