Sarkaru Vaari Paata: 7న ‘సర్కారు..’ వేడుక

మహేష్‌ బాబు కథానాయకుడిగా పరశురామ్‌ తెరకెక్కించిన యాక్షన్‌ ఎంటర్‌టైనర్‌ ‘సర్కారు వారి పాట’. జీఎంబీ ఎంటర్‌టైన్‌మెంట్‌, 14 రీల్స్‌ ప్లస్‌, మైత్రీ మూవీ మేకర్స్‌ సంస్థలు సంయుక్తంగా నిర్మించాయి. కీర్తి సురేష్‌ కథానాయిక. ఈ సినిమా ఈనెల 12న విడుదల కానుంది. ఈ నేపథ్యంలోనే ప్రచార కార్యక్రమాల్లో భాగంగా ఈనెల 7న హైదరాబాద్‌లోని యూసఫ్‌గూడ పోలీస్‌ గ్రౌండ్స్‌లో విడుదల ముందస్తు వేడుక నిర్వహించనున్నారు. సాయంత్రం 6గంటల నుంచి ఈ వేడుక ప్రారంభం కానుంది. ఈ విషయాన్ని చిత్ర బృందం గురువారం అధికారికంగా ప్రకటించింది. ప్రీరిలీజ్‌ వేడుకలో భాగంగా పలు సర్‌ప్రైజ్‌లు అందించనున్నట్లు తెలిపారు. దీనికి ప్రస్తుతం ట్విటర్‌లో ప్రత్యేక ఎమోజీ వచ్చింది. దీన్ని చిత్ర బృందం అభిమానులతో పంచుకుంది. ఓ ప్రాంతీయ సినిమా ఇలా ప్రత్యేక ఎమోజీని కలిగి ఉండటం ఇదే తొలిసారని చిత్ర వర్గాలు తెలిపాయి.