Kalyan ram: అబ్బాయి చిత్రంలో బాబాయ్‌ పాట

‘బింబిసార’ (Bimbisara) వంటి విజయం తర్వాత కల్యాణ్‌ రామ్‌ (Kalyan Ram) నుంచి వస్తున్న కొత్త చిత్రం ‘అమిగోస్‌’ (Amigos). రాజేంద్ర రెడ్డి తెరకెక్కించిన ఈ సినిమాని మైత్రీ మూవీ మేకర్స్‌ సంస్థ నిర్మించింది. ఆషికా రంగనాథ్‌ కథానాయిక. ఈ చిత్రం ఫిబ్రవరి 10న విడుదల కానుంది. ఈ నేపథ్యంలోనే ప్రచార పర్వాన్ని వేగవంతం చేసింది చిత్ర బృందం. ఇందులో భాగంగా తాజాగా ఓ ప్రత్యేక వీడియో విడుదల చేశారు. అందులో కల్యాణ్‌రామ్‌ తన అభిమానులతో మాట్లాడుతూ ఓ ఆసక్తికర విషయాన్ని పంచుకున్నారు. తన బాబాయ్‌ బాలకృష్ణ (Balakrishna) నటించిన ‘ధర్మక్షేత్రం’లోని ‘‘ఎన్నో రాత్రులొస్తాయి గాని’’ పాటను ‘అమిగోస్‌’లో రీమిక్స్‌ చేసినట్లు తెలియజేశారు. ఈ గీతాన్ని త్వరలో విడుదల చేయనున్నట్లు చెప్పారు. ‘‘ఎన్నో రాత్రులొస్తాయి’’ పాటను ఇళయరాజా స్వరపరచగా.. ఎస్పీ బాలసుబ్రహ్మణ్యం, చిత్ర సంయుక్తంగా ఆలపించారు. ఇప్పుడీ గీతాన్ని జిబ్రాన్‌ సరికొత్తగా రీమిక్స్‌ చేశారు. మరి దీన్ని ఎవరు ఆలపించారు? తెరపై ఎలా ఉండనుంది? తెలియాలంటే మరికొన్ని రోజులు వేచి చూడాల్సిందే. ఈ సినిమాలో కల్యాణ్‌రామ్‌ త్రిపాత్రాభినయం చేశారు. ఒకే పోలికలున్న ముగ్గురు వ్యక్తుల కథగా ఈ చిత్రం ఉండనుంది. ఈ సినిమాకి కూర్పు: తమ్మిరాజు, ఛాయాగ్రహణం: సౌందర్‌ రాజన్‌.