Sehari: సినిమా చూశాక నాపై అభిప్రాయం మార్చుకుంటారు: ‘సెహరి’ హీరో హర్ష్‌

ఇంటర్నెట్‌ డెస్క్‌: ‘‘సెహరి’ చిన్న సినిమానే అవ్వొచ్చు కానీ ఓ బెంచ్‌ మార్క్‌ను క్రియేట్ చేస్తుంది. మాకున్న బడ్జెట్‌లో మంచి క్వాలిటీతో తెరకెక్కించాం. ఎవరూ ఇలా చేసుండరు’’ అని హర్ష్‌ కనుమిల్లి అన్నారు. ఈ చిత్రంతో ఆయన హీరోగా పరిచయమవుతున్నారు. జ్ఞానసాగర్‌ దర్శకత్వం వహించిన ఈ సినిమా ఫిబ్రవరి 11న విడుదల కానుంది. ఈ సందర్భంగా చిత్ర బృందం ప్రీ రిలీజ్‌ ఈవెంట్‌ను నిర్వహించింది.

హర్ష్‌ మాట్లాడుతూ.. ‘‘దర్శకుడు జ్ఞానసాగర్‌ ఈ చిత్రాన్ని చాలా బాగా తెరకెక్కించాడు. అతడు పెద్ద దర్శకుడు అవుతాడనే నమ్మకం నాకుంది. ఈ సినిమా కథానాయిక సిమ్రన్‌ చౌదరి నుంచి ఎన్నో విషయాలు నేర్చుకున్నా. ఈ చిత్రంలో తన అందం, అభినయంతో ప్రేక్షకుల్ని కట్టిపడేస్తుంది. ఈ సినిమాలోని ‘ర్యాప్‌ బ్యాటిల్‌’ కొత్త అనుభూతి పంచుతుంది. మిమ్మల్ని సర్‌ప్రైజ్‌ చేసేందుకే దాన్ని విడుదల చేయలేదు. థియేటర్లలో చూసి ఎంజాయ్‌ చేయండి. నాన్‌స్టాప్‌గా మిమ్మల్ని నవ్వించాలనే ఆలోచనతోనే ఈ చిత్రాన్ని రూపొందించాం. ట్రైలర్‌ విడుదల ప్రెస్‌మీట్‌లో నేను అతి విశ్వాసం (ఓవర్‌ కాన్ఫిడెన్స్‌)తో మాట్లాడానని చాలా మంది అన్నారు. కానీ, సినిమా చూశాక నాపై అభిప్రాయాన్ని మార్చుకుంటారు. తప్పకుండా అందరినీ అలరిస్తా’’ అని అన్నారు. ఈ వేడుకలో చిత్ర దర్శకుడు జ్ఞానసాగర్‌, కథానాయిక సిమ్రన్‌ చౌదరి, సంగీత దర్శకుడు ప్రశాంత్‌ ఆర్‌.విహారి తదితరులు పాల్గొన్నారు.