నిర్మాతగా మారనున్న షాహిద్‌

ముంబయి: షాహిద్‌కపూర్‌ చేతినిండా సినిమాలున్నాయి. ‘జెర్సీ’ చిత్రీకరణనూ పూర్తి చేశాడు. కొన్ని భారీ చిత్రాలు పట్టాలెక్కడానికి సిద్ధంగా ఉన్నాయి. ఈ మధ్యే రాజ్, డీకే దర్శకత్వంలో అమెజాన్‌ ప్రైమ్‌ కోసం ఓ వెబ్‌సిరీస్‌లో నటించడానికి కూడా గ్రీన్‌ సిగ్నల్‌ ఇచ్చేశాడు. ఇప్పుడు మరోసారి డిజిటల్‌ ఎంట్రీ ఇవ్వనున్నాడు. ఈసారి నిర్మాతగా మారనున్నాడు. నెట్‌ఫ్లిక్స్‌ ఓ భారీ ట్రయాలజీని నిర్మించబోతుంది. దీని కోసం షాహిద్‌కు సుమారు రూ.70- 80 కోట్లు ఇవ్వబోతున్నారట. అమిత్‌ త్రిపాఠి నవల ఆధారంగా ఇది తెరకెక్కనుందని తెలుస్తోంది. జానపద నేపథ్య కథతో రానున్న ఈ ప్రాజెక్టులో షాహిద్‌ భాగం కావాలనుకుంటున్నాడట. గతంలోనే డింకీ సింగ్‌ బయోపిక్‌తో నిర్మాతగా మారాలనుకున్నాడు షాహిద్‌. కానీ ఆ ప్రాజెక్టు ఆగిపోయింది. దీంతో నెట్‌ఫ్లిక్స్‌తో కలిసి ఈ ట్రయాలజీలో నిర్మాణ భాగస్వామి కాబోతున్నాడట షాహిద్‌.