Yash: సెన్సేషనల్‌ డైరెక్టర్‌ దర్శకత్వంలో యశ్‌ తర్వాతి చిత్రం?

చెన్నై: ‘కేజీయఫ్‌ 1, 2’ చిత్రాలతో ఇండియన్‌ బాక్సాఫీస్‌ వద్ద కాసుల వర్షం కురిపించాడు యశ్‌. ప్రశాంత్‌నీల్‌ తెరకెక్కించిన ఆ చిత్రాలతో యశ్‌ పాన్‌ ఇండియా స్టార్‌ అయిపోయాడు. మరి ‘కేజీయఫ్‌’ తర్వాత యశ్‌ చేయబోయే చిత్రం ఏంటి? ప్రస్తుతం సినీ అభిమానుల అందరిలోనూ ఇదే ప్రశ్న మెదులుతోంది. దీనికి సమాధానంగా ఓ వార్త కోలీవుడ్‌లో చక్కర్లు కొడుతోంది. భారీ సినిమాల దర్శకుడు శంకర్‌ దర్శకత్వంలో యశ్‌ తన తర్వాతి చిత్రాన్ని చేస్తారని టాక్‌ నడుస్తోంది. రూ.1000కోట్ల భారీ బడ్జెట్‌తో ఈ సినిమా ఉంటుందని సమాచారం. కరణ్‌ జోహార్‌, నెట్‌ఫ్లిక్స్‌ ఇండియా, పెన్‌ మీడియా సంస్థలు సంయుక్తంగా నిర్మించే అవకాశం ఉంది. ఇంతకీ కథేంటో తెలుసా? తమిళ ఎపిక్‌ నవల ‘వల్పరి’ ఆధారంగా ఈ సినిమాను తెరకెక్కించనున్నారట. సు.వెంకటేశన్‌ రాసిన ఈ నవల సాహిత్య అకాడమీ అవార్డును దక్కించుకుంది. ఈ సినిమా గురించి పూర్తి వివరాలు తెలియాలంటే ఇంకొన్ని రోజులు వేచి చూడాల్సిందే. ఎందుకంటే ప్రస్తుతం శంకర్‌ రెండు సినిమాలు చిత్రీకరణలో ఉన్నాయి. కమల్‌హాసన్‌తో కలిసి ‘భారతీయుడు-2’ తీస్తుండగా, రామ్‌చరణ్‌ కథానాయకుడిగా ‘ఆర్‌సీ15’ వర్కింగ్‌ టైటిల్‌తో మరో చిత్రం తెరకెక్కుతోంది.