Shah Rukh Khan: ఇలాంటివి ఎన్నో చూశాను.. ఏవీ సినిమా స్థాయిని తగ్గించలేవు..

హైదరాబాద్‌: 2022లో బాలీవుడ్‌లో చాలా సినిమాలు అనుకున్న స్థాయిలో అలరించలేదని దానికి ఒక కారణం ఓటీటీలని ఈ మధ్య కాలంలో చర్చ జరిగిన విషయం తెలిసిందే. దీనిపై బాలీవుడ్‌ అగ్ర హీరో షారుక్‌ ఖాన్‌ (Shah Rukh Khan)స్పందించాడు. కొవిడ్‌ కారణంగా ప్రేక్షకులు కంటెంట్‌ చూసే విధానంలో మార్పు వచ్చిందన్నారు. మొబైల్‌ స్క్రీన్‌ చాలా చిన్నగా ఉంటుందని అందులో సినిమా చూస్తే థియేటర్లో చూసిన అనుభూతి రాదన్నారు. సినిమా స్థాయిని ఏదీ తగ్గించలేదని షారుక్‌ అన్నారు.

ఇటీవల జరిగిన రెడ్‌ సీ ఫెస్టివల్‌(Red Sea Festival)లో షారుక్‌ మాట్లాడుతూ.. ‘నేను మూడు దశాబ్దాలుగా సినిమా రంగంలో కొనసాగుతున్నాను. ఇలాంటివి ఎన్నో చూశాను. టీవీలు వచ్చిన సమయంలో ‘టీవీ వచ్చింది ఇక థియేటర్లో సినిమాలు ఎవరు చూస్తారు’ అన్నారు. ఆ తర్వాత వీసీఆర్‌లు వచ్చాయి. ‘ఇక సినిమాలన్నీ వీసీఆర్‌లోనే చూస్తారని’ అన్నారు. కానీ ఏదీ మారలేదు. సినిమాను ఆదరించేవారు ఎప్పటికీ ఆదరిస్తూనే ఉంటారు. చలనచిత్ర రంగం కొత్తపుంతలు తొక్కుతూ నూతనోత్సాహంతో ముందుకు వస్తుంది’అని ధీమా వ్యక్తం చేశారు.

అలాగే థియేటర్లో సినిమా చూస్తే ఔటింగ్‌కు వెళ్లినట్లు ఉంటుందని మొబైల్‌లో చూస్తే అలా ఉండదన్నారు. దాదాపు 5 సంవత్సరాల తర్వాత తన సినిమాను థియేటర్‌లో విడుదల చేయనున్నాడు ఈ బాలీవుడ్‌ స్టార్‌ హీరో. తన తాజా చిత్రం ‘పఠాన్‌’(Pathaan)తో కమ్‌బ్యాక్‌కు సిద్ధమయ్యాడు. జనవరి 25న ఈ సినిమా ప్రేక్షకులను అలరించనుంది. సిద్ధార్థ్‌ ఆనంద్‌ తెరకెక్కిస్తున్న ఈ చిత్రాన్ని యశ్‌రాజ్‌ ఫిల్మ్స్‌ సంస్థ నిర్మిస్తోంది. జాన్‌ అబ్రహం(John Abraham), దీపికా పదుకొణె(Deepika Padukone) కీలక పాత్రల్లో నటిస్తున్నారు.