Shruti Haasan: వీరసింహారెడ్డి.. వాల్తేరు వీరయ్య ఒకేసారి రావడం నా అదృష్టం

‘‘నేనెప్పుడూ కథలో నా పాత్ర బాగుందా లేదా? నా మనసుకు నచ్చిందా? లేదా? అని ఆలోచించే ఓ సినిమాకు ఓకే చెప్తా. అంతేకానీ, ఆ పాత్ర చేస్తే ప్రేక్షకులు ఏం అనుకుంటారు? దాన్ని ఎలా స్వీకరిస్తారు? అన్నది దృష్టిలో పెట్టుకోను. నా మనసుకు ఏది సరైనదనిపిస్తే అది చేస్తా’’ అంది కథానాయిక శ్రుతిహాసన్‌ (Shruti Haasan). ప్రస్తుతం అగ్ర హీరోలతో వరుస సినిమాలు చేస్తూ జోరు చూపిస్తున్న ఈ నాయిక.. సంక్రాంతికి ‘వీరసింహారెడ్డి’ (Veera Simha Reddy), ‘వాల్తేరు వీరయ్య’ (Waltair Veerayya) చిత్రాలతో ప్రేక్షకుల్ని పలకరించనుంది. ఈ నేపథ్యంలోనే  శ్రుతిహాసన్‌ పంచుకున్న విశేషాలు..

ఈసారి మీ సంక్రాంతి సంబరాలు ఎలా ఉండనున్నాయి?

‘‘నేను తెలుగు చిత్ర పరిశ్రమలోకి అడుగు పెట్టిన తర్వాతే సంక్రాంతి పండుగ అనేది నా జీవితంలోకి వచ్చింది. తమిళనాడులో ఈ పదం వినిపించదు. అక్కడ పొంగల్‌ అంటాం. అందరిలాగే నేనూ ఈ పండుగను కుటుంబ సభ్యుల మధ్య జరుపుకోనున్నా. పూజ చేసుకొని.. పొంగల్‌ తింటూ హ్యాపీగా ఫ్యామిలీతో గడపాలనుకుంటున్నా. ఇంతకంటే హడావుడి ఏం చేయట్లేదు’’.  

ఈ పండక్కి రెండు చిత్రాలతో వస్తున్నారు. మీతో మీరే పోటీ పడుతున్నారు. ఏమన్నా ఒత్తిడిగా ఉందా?

‘‘వాల్తేరు వీరయ్య’, ‘వీరసింహారెడ్డి’ చిత్రాలు రెండూ ఒకేసారి వస్తాయని అసలు ఊహించలేదు. నా కెరీర్‌లో ఇలా జరగడం ఇది రెండో సారి. గతంలోనూ ఓ పండక్కి ఇలాగే నా రెండు సినిమాలు ఒకేసారి విడుదలయ్యాయి. అయితే ఈ సంక్రాంతి మాత్రం చాలా ప్రత్యేకం. చిరంజీవి (Chiranjeevi), బాలకృష్ణ (Balakrishna) లాంటి ఇద్దరు లెజెండ్‌ హీరోలతో కలిసి ఒకేసారి రావడం అదృష్టంగా భావిస్తున్నా. ఇప్పుడు ఒత్తిడి ఏం లేదు. కాకపోతే రెండు చిత్రాలు సెట్స్‌పై ఉన్నప్పుడు ఒత్తిడిగానే అనిపించేది. నా ఎక్స్‌ప్రెషన్స్‌ ఎలా వచ్చాయి? సంభాషణలు సరిగ్గా చెప్పానా? హవభావాలు సరిగ్గా పలికాయా లేదా? అని ఆలోచిస్తుండేదాన్ని. నా పని పూర్తయ్యాక మాత్రం ఎలాంటి ఒత్తిడీ లేదు. ఎందుకంటే ఇప్పుడు ఫలితం ప్రేక్షకుల చేతుల్లో ఉంది’’.

ఈ రెండు చిత్రాల్లో మీ పాత్రలు ఎలా ఉండనున్నాయి?

‘‘వీరసింహారెడ్డి’లో నా పాత్ర వినోదాత్మకంగా ఉంటుంది. ‘బలుపు’ చిత్రంలోని నా శ్రుతి పాత్రలో కనిపించే ఎనర్జీ ఇందులోనూ కనిపిస్తుంది. ప్రేక్షకుల్ని చాలా నవ్విస్తుంది.  ‘వాల్తేరు వీరయ్య’లో నా పాత్ర ఫన్నీగా ఉంటుంది. అదే సమయంలో కాస్త యాక్షన్‌ టచ్‌ కూడా ఉంటుంది. సినిమాలో నాకు చిరంజీవికి మధ్య చిన్న ఫన్నీ ఫైట్‌ ఉంటుంది. దాన్ని రామ్‌ - లక్ష్మణ్‌ కొరియోగ్రాఫ్‌ చేశారు. ఈ రెండు చిత్రాలు వేటికవే పూర్తి భిన్నంగా ఉంటాయి. కథ కథనాలు చాలా కొత్తగా.. ఆకట్టుకునేలా ఉంటాయి’’.

చిరంజీవి, బాలకృష్ణ చాలా మంచి డ్యాన్సర్లు. వాళ్లతో కలిసి కాలు కదపడం ఏమన్నా సవాల్‌గా అనిపించిందా?

‘‘చిరు, బాలయ్యలతో కలిసి డ్యాన్స్‌ చేయడం చాలా బాగుంది. ఈ రెండు సినిమాలకీ శేఖర్‌ మాస్టర్‌ కొరియోగ్రాఫర్‌గా పని చేశారు. ‘‘సుగుణ సుందరి’’ పాటలోని స్టెప్స్‌ చాలా మంచి ఆదరణ దక్కించుకుంటున్నాయి. అలాగే ‘‘శ్రీదేవి - చిరంజీవి’’ (Sridevi - Chiranjeevi) పాటలోనూ భిన్నమైన గ్రేస్‌ ఉన్న స్టెప్స్‌ చేశాం. ఆ పాటకీ చక్కటి ఆదరణ లభిస్తోంది. దీన్ని మేము యూరోప్‌లో మైనస్‌ 11డిగ్రీల చలిలో షూట్‌ చేశాం. ఆ చలిని తట్టుకోవాలంటే ఓ కోట్‌ సరిపోదు. నాలుగైదు కోట్స్‌ ధరించాలి. అంత గడ్డకట్టించే చలిలో ఓ పలుచటి చీర కట్టుకొని స్టెప్పేయడం చాలా సవాల్‌గా అనిపించింది’’.

ఇలాంటి కఠిన సందర్భాల్లో దర్శకుడు వన్‌మోర్‌ అడిగితే మీకెలా అనిపిస్తుంది?

‘‘దర్శకుడు అడిగితే కచ్చితంగా చేయాల్సిందే. నా పని అది. నిజానికి ఇలాంటి సవాళ్ల మధ్య పని చేయడం ఆ సమయానికి కాస్త కష్టం అనిపించొచ్చు. కానీ, తెరపై చూసుకున్నప్పుడు అది ప్రేక్షకులకు నచ్చితే.. మళ్లీ మళ్లీ ఇలాంటి సవాళ్లు స్వీకరించాలనిపిస్తుంది. అంతేకానీ, ఇలా మరోసారి చేయకూడదని ఎప్పుడూ అనిపించదు’’.

గోపీచంద్‌ మలినేని మిమ్మల్ని లక్కీ హీరోయిన్‌ అంటుంటారు. ఆ ‘లక్‌’ అనే మాటను మీరు విశ్వసిస్తారా?

‘‘లక్‌’ అనే మాటను నేను నమ్మను. నేనెప్పుడూ నా కష్టాన్నే నమ్ముతా. అలాగే దేవుణ్ని విశ్వసిస్తా. ఎవరైనా నన్ను ‘లక్కీ హీరోయిన్‌’ అంటే సంతోషమే. వాళ్లకు కృతజ్ఞతలు చెబుతా. అంతేకానీ దాన్ని పట్టించుకోను. ఎందుకంటే ఒకానొక సమయంలో నేను ‘అన్‌ లక్కీ’ అనే మాటలు కూడా విన్నా. కానీ, అనుకోకుండా ఓ సినిమా విడుదలయ్యాక ‘లక్కీ’గా పేరు మారింది. అందుకే ఈ మాటల్ని అంత సీరియస్‌గా ఎప్పుడూ తీసుకోను. ఒకవేళ ఎవరైనా అలా అంటే మాత్రం దాన్నొక ఆశీర్వాదంలా భావిస్తా’’.

‘సలార్‌’ (Salaar) విశేషాలేంటి?

‘‘ప్రభాస్‌ (Prabhas), ప్రశాంత్‌ నీల్‌తో (Prashanth Neel) కలిసి పని చేయడం చాలా బాగుంది. పాత్రల పరంగా చూసినా.. సినిమా స్కేల్‌ పరంగా చూసినా మరోస్థాయిలో ఉండే చిత్రమిది. ఇప్పటికే చాలా వరకు చిత్రీకరణ పూర్తయింది. నా పాత్రకు సంబంధించి ఇంకా కొత్త చిత్రీకరణ మిగిలి ఉంది. అందరిలాగే ఈ సినిమా కోసం నేనూ ఎంతో ఆసక్తిగా ఎదురుచూస్తున్నా’’.

ఉత్తరాది, దక్షిణాది చిత్రాలపై పెద్ద చర్చ నడు స్తోంది. ఈ ట్రెండ్‌పై మీ అభిప్రాయమేంటి?

‘‘సినిమాలు పక్కకు పెడితే.. నా జీవితాన్ని చూస్తే నేనే ఓ పాన్‌ ఇండియన్‌. మా నాన్న అన్ని భాషల్లో పని చేశారు. ఇంట్లో హిందీ, తమిళ, తెలుగు, ఇంగ్లిష్‌.. ఇలా పలు భాషలు వినిపిస్తాయి. తినే ఆహారం కూడా అంతే. ఒకే టేబుల్‌పై మహారాష్ట్ర ఫిష్‌ కర్రీ, చపాతీతో పాటు సాంబార్‌, రసం, రైస్‌ కనిపిస్తాయి. ఇలా ఇంట్లోనే ఓ పాన్‌ ఇండియా వాతావరణం ఉంది. నాన్న మాకెప్పుడూ ఒకటే చెబుతారు. బాలీవుడ్‌, కోలీవుడ్‌, టాలీవుడ్‌ అన్న మాటలొద్దు.. ఇండియన్‌ సినిమా అనమంటారు. ఆ తర్వాత అవసరమైతే భాష గురించి చెప్పమంటారు. ఇదే నా మనసులో బలంగా నాటుకుపోయింది. ఇప్పుడు ఉత్తరాది, దక్షిణాది చిత్రసీమలన్నీ కలిసి పని చేస్తున్నాయి. ఇది మంచి ఆరోగ్యకరమైన వాతావరణం. దీన్ని విడదీసి చూడాలనుకోవడం సరికాదు’’.

బాలకృష్ణ, చిరంజీవి సెట్లో మీకేమైనా విలువైన సలహాలు ఇచ్చేవారా?

‘‘వాళ్లు ప్రత్యేకంగా సలహాలేమీ ఇవ్వలేదు.. కానీ, నేను వాళ్ల నుంచి ఎన్నో విలువైన విషయాలు నేర్చుకున్నా. బాలకృష్ణ ఎప్పుడూ ఎనర్జిటిక్‌గా ఉంటారు. సానుకూల దృక్పథంతో ఆలోచిస్తుంటారు. దేవుడ్ని బలంగా విశ్వసిస్తారు. ఇలాంటివి ఆయన నుంచి నేర్చుకున్నా. ఇక చిరంజీవి విషయానికొస్తే.. ఆయన చాలా నెమ్మదైన మనిషి. ప్రతిఒక్కరినీ ఎంతో ఆప్యాయంగా పలకరిస్తారు. చాలా సౌమ్యంగా ఉంటారు. ఇవి నాకెంతో స్ఫూర్తినిచ్చేవి. ఇలా ఇద్దరి నుంచి చాలా గొప్ప విషయాలు నేర్చుకున్నా’’.