Siddharth: కోస్టార్‌తో సిద్ధార్థ్‌ ప్రేమాయణం అంటూ వార్తలు.. ఫొటో షేర్‌ చేసిన నటుడు

ఇంటర్నెట్‌డెస్క్‌: తన సహనటి అదితిరావు హైదరీ (Aditi Rao)తో నటుడు సిద్ధార్థ్‌ (Siddharth) ప్రేమలో ఉన్నారంటూ కొంత కాలం నుంచి వార్తలు వస్తున్నాయి. పలు పార్టీల్లో వీళ్లిద్దరూ కలిసి పాల్గొన్నఫొటోలు బయటకు వచ్చాయి కూడా. ఈ నేపథ్యంలో తాజాగా సిద్ధార్థ్‌.. ఆమె ఫొటోని షేర్‌ చేయడం ఇప్పుడు నెట్టింట హాట్‌ టాపిక్‌గా మారింది.

కొంత కాలంగా తెలుగు సినిమాలకు దూరంగా ఉన్న సిద్ధార్థ్‌..  ఇటీవల కాలంలో ‘మహాసముద్రం’తో ముందుకువచ్చాడు. ఇంటెన్స్‌ ప్రేమకథతో తెరకెక్కిన ఈ సినిమాలో అతడికి జోడీగా అదితిరావు హైదరీ నటించింది. ఈ సినిమా షూటింగ్‌ సమయంలోనే వీరిద్దరి మధ్య స్నేహం కుదిరింది. ఆ తర్వాత వీరిద్దరూ ముంబయిలోని రెస్టారెంట్స్‌ వద్ద సందడి చేశారు. దీంతో వీళ్లు ప్రేమలో ఉన్నారని ఆంగ్ల పత్రికల్లో వార్తలు చక్కర్లు కొట్టాయి. ఇదిలా ఉండగా, అదితి పుట్టినరోజు పురస్కరించుకుని ఆమెతో దిగిన ఓ ఫొటోని సిద్ధార్థ్‌ ఇన్‌స్టాలో షేర్‌ చేశాడు. ‘‘హృదయ యువరాణికి పుట్టినరోజు శుభాకాంక్షలు. చిన్నా పెద్దా అనే తేడా లేకుండా నీ ప్రతి కల నెరవేరాలని కోరుకుంటున్నాను’’ అని పేర్కొన్నాడు. ఈ ఫొటో నెట్టింట వైరల్‌గా మారడంతో దీనిని చూసిన నెటిజన్లు.. ‘చూడచక్కనైన జోడీ. నిజంగానే ప్రేమలో ఉన్నారా?’ అంటూ తమ సందేహాలను వ్యక్తం చేస్తున్నారు.