Sidharth Malhotra: సిద్ధార్థ్‌ ‘బోల్డ్‌ అనౌన్స్‌మెంట్‌’.. ఆయన చెప్పబోయేది దాని గురించేనా?

ఇంటర్నెట్‌ డెస్క్: అభిమానులు, ప్రేక్షకుల్లో ఆసక్తి రేకెత్తించేందుకు పలువురు నటులు ఏ విషయాన్నీ నేరుగా చెప్పరు. సృజనాత్మకతను ప్రదర్శిస్తుంటారు. దాంతో, నటులు ఇచ్చిన హింట్‌ను ఒక్కొక్కరూ ఒక్కోలా అర్థం చేసుకుంటారు. బాలీవుడ్‌ నటుడు సిద్ధార్థ్‌ మల్హోత్ర (Sidharth Malhotra) తాజా పోస్ట్‌పై ఇదే వ్యవహారం నడుస్తోంది. ‘రేపు బోల్డ్‌ అనౌన్స్‌మెంట్‌ రాబోతోంది’ అని ఆయన ఆదివారం ఓ పోస్ట్‌ పెట్టారు. దాన్ని చూసిన నెటిజన్లలో కొందరు ఆయన పెళ్లి ప్రస్తావన తీసుకొచ్చారు. కొందరు సినిమా ప్రకటన అనే అభిప్రాయాన్ని వెలిబుచ్చారు. ‘ఇప్పటికే రణ్‌వీర్‌సింగ్‌ బోల్డ్‌గా కనిపించారు. మీరు అలా చేయకండి’ అంటూ ఒకరు వ్యంగ్యంగా స్పందించారు. మరి, సిద్ధార్థ్‌ ఏం చెబుతారో తెలియాలంటే కొన్ని గంటలు వేచి చూడాల్సిందే.

నటి కియారా అడ్వాణీతో సిద్ధార్థ్‌ ప్రేమలో ఉన్నారంటూ ఇటీవల ప్రచారం జరిగింది. పలు టెలివిజన్‌ కార్యక్రమాల్లోనూ ఈ ఇద్దరికీ పెళ్లిపై ప్రశ్నలు ఎదురయ్యాయి. అయితే, వారు సమాధానాన్ని దాట వేసేవారు. సిద్ధార్థ్‌ ఇప్పుడు ‘ప్రకటన’ అని అనడంతో అత్యధికమంది మ్యారేజ్‌ గురించే అని ఫిక్స్‌ అయిపోయారు. సిద్ధార్థ్‌ ఈ ఏడాది ‘మిషన్‌ మజ్ను’ (Mission Majnu) సినిమాతో ప్రేక్షకులను పలకరించారు. రష్మిక కథానాయికగా నటించిన ఈ సినిమా నేరుగా ఓటీటీ ‘నెట్‌ఫ్లిక్స్‌’లో విడుదలైంది.