Simbu: ‘ముత్తు’గా శింబు.. పవర్‌ఫుల్‌ చిత్రం విడుదల ఆరోజే

ఇంటర్నెట్‌ డెస్క్‌: శింబు (Silambarasan) ప్రధాన పాత్రలో దర్శకుడు గౌతమ్‌ వాసుదేవ్‌ మేనన్‌ రూపొందించిన తమిళ చిత్రం ‘వెందు తనిందతు కాడు’ (Vendhu Thanindhathu Kaadu). సిద్ధి ఇద్నాని కథానాయిక. రాధిక కీలక పాత్ర పోషించారు. శ్రీ స్రవంతి మూవీస్‌ సంస్థ.. ‘ది లైఫ్‌ ఆఫ్‌ ముత్తు’ (The Life of Muthu) పేరుతో ఈ చిత్రాన్ని తెలుగులో విడుదల చేయనుంది. ఈ విషయాన్ని ప్రకటిస్తూ సదరు సంస్థ సోషల్‌ మీడియా వేదికగా టైటిల్‌ పోస్టర్‌ను పంచుకుంది. లుంగీ ధరించి, గ్రామీణ యువకుడి పాత్రలో అమాయకంగా కనిపించారు శింబు. ఈ సినిమా గ్రామీణ నేపథ్యంలో సాగే పవర్‌ఫుల్‌ కథతో తెరకెక్కినట్టు, శింబు ద్విపాత్రాభినయం చేసినట్టు ఇటీవల విడుదలైన తమిళ ట్రైలర్‌ చూస్తే తెలుస్తోంది. తెలుగు, తమిళ భాషల్లో ఈ సినిమా ఈ నెల 15న ప్రేక్షకుల ముందుకురానుంది. ఈ సినిమాకి ఎ. ఆర్‌. రెహమాన్‌ సంగీతం అందించారు. గౌతమ్‌- శింబు- రెహమాన్‌ కాంబినేషన్‌లో గతంలో తెరకెక్కిన క్లాసిక్‌ ప్రేమకథ ‘విన్నైతాండి వరువాయా’ (ఏమాయ చేశావే) సూపర్‌ హిట్‌గా నిలిచిన సంగతి తెలిసిందే. దాంతో, ఈ కొత్త చిత్రంపై సినీ అభిమానుల్లో ఆసక్తి నెలకొంది.