SJ Surya: ఆ విషయాన్ని తట్టుకోలేకపోయా.. గుక్కపెట్టి ఏడ్చా: ‘ఖుషి’ డైరెక్టర్‌

చెన్నై: కెరీర్‌కు సంబంధించిన ఓ విషయాన్ని తాను ఎప్పటికీ మర్చిపోనని ‘ఖుషి’ దర్శకుడు, నటుడు ఎస్‌.జె.సూర్య (SJ Surya) తెలిపారు. అగ్రహీరోతో తాను నటించిన ఓ ప్రాజెక్ట్‌ మధ్యలోనే నిలిచిపోయిందని, ఆనాడు తాను గుక్కపెట్టి ఏడ్చానని చెప్పారు. ఇంతకీ ఆ ప్రాజెక్ట్‌ ఏమిటి? ఆ నటుడు ఎవరంటే..?

‘‘ఒక నటుడిగా వివిధ భాషలకు చెందిన సినీ పరిశ్రమల్లో పనిచేయాలని, నన్ను నేను నిరూపించుకోవాలని కలలు కన్నాను. అందుకు అనుగుణంగా అమితాబ్‌ బచ్చన్‌తో నటించే అవకాశం నన్ను వరించింది. మేమిద్దరం ప్రధాన పాత్రధారులుగా కోలీవుడ్‌లో ఓ సినిమా పట్టాలెక్కింది. సుమారు 10 రోజులపాటు షూట్‌ చేశాం. తీరా చూస్తే, సినిమా ఆగిపోయింది. ఆ విషయాన్ని నేను అంగీకరించలేకపోయాను. చిన్నపిల్లాడిలా కిందపడి గుక్కపెట్టి ఏడ్చాను. ఇప్పటికీ ఆ రోజులు మర్చిపోను. భగవంతుడు ఎందుకు నాకు ఇంతటి బాధను ఇచ్చాడనుకున్నా. కానీ ఇప్పుడు ఆ దేవుడే నాకు వరుస సినిమాల్లో నటించే అవకాశాన్ని కల్పించాడు. సుమారు ఐదేళ్ల నుంచి అమితాబ్‌ ప్రాజెక్ట్‌ తిరిగి ఎప్పుడు మొదలవుతుందోనని ఎదురుచూస్తున్నా’’ అని చెప్పారు. 

‘‘నా స్వీయ దర్శకత్వంలో వచ్చిన ‘Anbe Aaruyire’ ‘NEW’.. వంటి చిత్రాలు ప్రేక్షకులకు నన్ను చేరువ చేశాయి. అయితే, ఆయా చిత్రాలు వీక్షించి ఇండస్ట్రీలో ఉన్న పలువురు ప్రముఖులు నాపై కామెంట్స్‌ చేశారు. నా యాక్టింగ్‌ చెత్తగా ఉంటుందని విమర్శించారు. అలాంటి మాటలు విన్న తర్వాతే, నటుడిగా నన్ను నేను మెరుగుపరుచుకున్నా. ప్రస్తుతం అందరి ప్రశంసలు అందుకుంటున్నా’’ అని సూర్య తెలిపారు.