Tip Tip Song: అప్పుడు రవీనా.. ఇప్పుడు కత్రినా.. టిప్‌ టిప్‌ బర్‌సా పానీ..!

ఇంటర్నెట్‌డెస్క్‌: ఒక చిత్రంలో విజయవంతమైన పాటను రీమిక్స్‌ చేసిన కొత్త చిత్రంలో వాడుకోవటం అన్ని భాషల్లోనూ చూస్తుంటాం. గతంలో తెలుగులో వచ్చిన పాటలెన్నో రీమిక్స్‌ అయ్యాయి. అవుతున్నాయి. 90 దశకంలో కుర్రకారుకు నిద్రలేకుండా చేసిన బాలీవుడ్‌ సాంగ్‌ ‘టిప్‌ టిప్‌ బర్‌సా పానీ’. అక్షయ్‌కుమార్‌, రవీనా టాండన్‌ జంటగా నటించిన ‘మోహ్ర’ చిత్రంలోని ఈ పాట ఇప్పటికీ ఎవర్‌గ్రీన్‌. పసుపు రంగు చీరలో రవీనా వానలో తడుస్తూ అందాలను ఒలకబోస్తుంటే, ఆ వయ్యారాల ఒంపులు చూసి అందులో హీరో అక్షయ్‌ మాత్రమే కాదు, తెరపై సినిమా చూస్తున్న యువత కూడా పిచ్చెక్కిపోయారు. ఇప్పుడు అదే పాటను అక్షయ్‌ కుమార్‌, కత్రినాకైఫ్ జంటగా నటించిన యాక్షన్‌ థ్రిల్లర్‌ ‘సూర్యవంశీ’ కోసం రీమిక్స్‌ చేశారు సంగీత దర్శకుడు తనిష్‌ బాగ్చి. రోహిత్‌శెట్టి తెరకెక్కిన ఈ చిత్రం  దీపావళి కానుకగా ప్రేక్షకుల ముందుకు వచ్చింది. ఈ సినిమా కోసం ‘టిప్‌ టిప్‌ బర్‌సా పానీ’ పాటను రీమిక్స్‌ చేశారు. ఫరాఖాన్‌ నృత్యాలు సమకూర్చారు. అప్పట్లో రవీనా తళుకు బెళుకులకు ఏమాత్రం తీసిన పోని విధంగా కత్రినా అదరగొట్టేసింది. అప్పటి యువత పరిస్థితి ఏంటో తెలియదు కానీ, ఇప్పుడు మాత్రం కత్రినా డ్యాన్స్‌, అందాలకు అందరూ ఫిదా అవుతున్నారు. ప్రస్తుతం యూట్యూబ్‌లో దూసుకుపోతున్న ఈ పాటనూ, అప్పట్లో రవీనా పాటను రెండింటినీ చూసేయండి.